ബാഗ്ദാദ്: ഇറാഖ് തലസ്ഥാനമായ ബാഗ്ദാദിൽ വെച്ച് പ്രമുഖ അമേരിക്കൻ ഫ്രീലാൻസ് മാധ്യമപ്രവർത്തക ഷെല്ലി കിറ്റിൽസണെ അജ്ഞാതർ തട്ടിക്കൊണ്ടുപോയി. ചൊവ്വാഴ്ച വൈകുന്നേരം ബാഗ്ദാദ് നഗരമധ്യത്തിലെ സാദൂൺ സ്ട്രീറ്റിൽ വെച്ചാണ് സംഭവം നടന്നതെന്ന് ഇറാഖി ആഭ്യന്തര മന്ത്രാലയം സ്ഥിരീകരിച്ചു.ഇറാൻ അനുകൂല സായുധ ഗ്രൂപ്പായ ‘കതൈബ് ഹിസ്ബുള്ള’യിൽ നിന്ന് ഷെല്ലി കിറ്റിൽസണ് വധഭീഷണിയോ തട്ടിക്കൊണ്ടുപോകൽ ഭീഷണിയോ നിലനിന്നിരുന്നതായും, അമേരിക്കൻ അധികൃതർ ഇവർക്ക് നേരത്തെ മുന്നറിയിപ്പ് നൽകിയിരുന്നതായും റിപ്പോർട്ടുകളുണ്ട്. എന്നാൽ ഈ മുന്നറിയിപ്പുകൾ അവഗണിച്ചാണ് അവർ ബാഗ്ദാദിൽ തുടർന്നത്.മിഡിൽ ഈസ്റ്റ് കേന്ദ്രീകരിച്ച് വർഷങ്ങളായി പ്രവർത്തിക്കുന്ന ഷെല്ലി കിറ്റിൽസൺ, അൽ-മോണിറ്റർ (Al-Monitor), ഫോറിൻ പോളിസി തുടങ്ങിയ പ്രമുഖ മാധ്യമങ്ങൾക്ക് വേണ്ടി റിപ്പോർട്ട് ചെയ്തിട്ടുണ്ട്. അവരുടെ സുരക്ഷിതമായ മോചനത്തിനായി അന്താരാഷ്ട്ര മാധ്യമ സംഘടനകൾ രംഗത്തെത്തിയിട്ടുണ്ട്.ഇറാഖിലെ അമേരിക്കൻ എംബസി വിഷയത്തിൽ നിലവിൽ പ്രതികരിച്ചിട്ടില്ലെങ്കിലും, ഇറാഖി കൗണ്ടർ ടെററിസം സർവീസും എഫ്.ബി.ഐയും (FBI) ചേർന്ന് അന്വേഷണം ഏകോപിപ്പിക്കുന്നുണ്ട്. വിദേശ അതിഥികളുടെ സുരക്ഷ ഉറപ്പാക്കുന്നതിൽ യാതൊരു വീഴ്ചയും വരുത്തില്ലെന്നും കുറ്റവാളികളെ നിയമത്തിന് മുന്നിൽ കൊണ്ടുവരുമെന്നും ഇറാഖി ആഭ്യന്തര മന്ത്രാലയം അറിയിച്ചു.
അവാർഡ് ജേതാവായ യുഎസ് മാധ്യമപ്രവർത്തക ഷെല്ലി കിറ്റിൽസൺ ബാഗ്ദാദിൽ തട്ടിക്കൊണ്ടുപോകപ്പെട്ടു
