ന്യൂഡൽഹി: ഐസിസി ടി20 ലോകകപ്പ് 2026 ജേതാക്കളായ ഇന്ത്യൻ ക്രിക്കറ്റ് ടീമിന് ഇന്ത്യൻ ക്രിക്കറ്റ് കൺട്രോൾ ബോർഡ് (ബി.സി.സി.ഐ) 131 കോടി രൂപയുടെ വൻ സമ്മാനത്തുക പ്രഖ്യാപിച്ചു. ടീം ഇന്ത്യയുടെ മികച്ച പ്രകടനത്തെ അഭിനന്ദിച്ചാണ് ഈ തുക പ്രഖ്യാപിച്ചതെന്ന് ബി.സി.സി.ഐ അറിയിച്ചു.
അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ഫൈനലിൽ ന്യൂസിലൻഡിനെ തോൽപ്പിച്ചാണ് ഇന്ത്യ കിരീടം സ്വന്തമാക്കിയത്. ഇതോടെ തുടർച്ചയായി രണ്ടാം തവണയും ടി20 ലോകകപ്പ് നേടുന്ന ആദ്യ ടീമെന്ന ചരിത്രവും ഇന്ത്യ കുറിച്ചു. കൂടാതെ, ടി20 ലോകകപ്പ് മൂന്ന് തവണ നേടുന്ന ആദ്യ രാജ്യമായി ഇന്ത്യ മാറുകയും ചെയ്തു. ടൂർണമെന്റിലെ വിജയത്തിന് ഐസിസിയിൽ നിന്ന് ഇന്ത്യക്ക് ഏകദേശം 3 മില്യൺ ഡോളർ (ഏകദേശം 27.5 കോടി രൂപ) സമ്മാനത്തുകയും ലഭിച്ചു. ബി.സി.സി.ഐ പ്രഖ്യാപിച്ച 131 കോടി രൂപയുടെ അധിക ബോണസുമായി ചേർന്ന് ടീം ഇന്ത്യയ്ക്ക് ലഭിക്കുന്ന ആകെ തുക 158 കോടി രൂപയ്ക്ക് മുകളിലെത്തും.
കളിക്കാരും പരിശീലക സംഘവും ഉൾപ്പെടെയുള്ള ടീമംഗങ്ങൾക്കിടയിൽ ഈ തുക വിതരണം ചെയ്യുമെന്നാണ് വിവരം. ഇന്ത്യൻ ടീമിന്റെ വിജയത്തെ “ഇന്ത്യൻ ക്രിക്കറ്റിന്റെ സ്വർണകാലഘട്ടത്തിന്റെ തെളിവ്” എന്നാണ് ബി.സി.സി.ഐ വിശേഷിപ്പിച്ചത്.
