സിഡ്നി: ഈസ്റ്റർ വാരാന്ത്യത്തോടനുബന്ധിച്ച് ഓസ്ട്രേലിയയിൽ ഇന്ധനവില വർധനവിനിടയിലും റോഡ് യാത്രകൾക്ക് തയ്യാറെടുക്കുന്നവർ ട്രാഫിക് നിയമങ്ങൾ പാലിക്കുന്നതിൽ അതീവ ജാഗ്രത പുലർത്തണമെന്ന് നിർദ്ദേശം. നിയമലംഘകർക്ക് ഇരട്ടി ഡെമെറിറ്റ് പോയിന്റുകൾ ശിക്ഷയായി നൽകുന്ന ‘ഡബിൾ ഡെമെറിറ്റ്’ കാലയളവ് ഈ ആഴ്ച മുതൽ ആരംഭിക്കും. എന്നാൽ എല്ലാ സംസ്ഥാനങ്ങളിലും ഈ നിയമം ബാധകമല്ല.
ന്യൂ സൗത്ത് വെയ്ൽസ് (NSW), എ.സി.ടി (ACT), വെസ്റ്റേൺ ഓസ്ട്രേലിയ (WA) എന്നിവിടങ്ങളിലാണ് അഞ്ച് ദിവസം നീണ്ടുനിൽക്കുന്ന കർശനമായ ഡബിൾ ഡെമെറിറ്റ് പരിശോധന നടക്കുക. ഏപ്രിൽ 2 വ്യാഴാഴ്ച മുതൽ ഏപ്രിൽ 6 തിങ്കളാഴ്ച വരെയാണ് ഈ കാലാവധി. അമിതവേഗത, മദ്യപിച്ചും മയക്കുമരുന്ന് ഉപയോഗിച്ചുമുള്ള ഡ്രൈവിംഗ്, സീറ്റ് ബെൽറ്റ് ധരിക്കാതിരിക്കുക, വാഹനമോടിക്കുമ്പോൾ മൊബൈൽ ഫോൺ ഉപയോഗിക്കുക തുടങ്ങിയ കുറ്റങ്ങൾക്കാണ് ഇരട്ടി പോയിന്റുകൾ നഷ്ടമാകുക. വെസ്റ്റേൺ ഓസ്ട്രേലിയയിൽ റെഡ് സിഗ്നൽ ലംഘിക്കുന്നവർക്കും ഈ ശിക്ഷ ലഭിക്കും. പോയിന്റുകൾ ഇരട്ടിയാകുമെങ്കിലും പിഴത്തുകയിൽ മാറ്റമുണ്ടാകില്ല.
ക്വീൻസ്ലൻഡിൽ അവധിക്കാലത്ത് മാത്രമായി ഡബിൾ ഡെമെറിറ്റ് നിയമമില്ല. പകരം, വർഷത്തിൽ എപ്പോൾ വേണമെങ്കിലും ഒരേ കുറ്റം ആവർത്തിക്കുന്നവർക്ക് അവിടെ ഇരട്ടി പോയിന്റ് ശിക്ഷ ലഭിക്കും. മൊബൈൽ ഉപയോഗം, മണിക്കൂറിൽ 20 കിലോമീറ്ററിൽ കൂടുതൽ വേഗതയിൽ വാഹനം ഓടിക്കുക തുടങ്ങിയ കുറ്റങ്ങൾ ഒരു വർഷത്തിനുള്ളിൽ രണ്ടാമതും ആവർത്തിച്ചാൽ കർശന നടപടിയുണ്ടാകും.
വിക്ടോറിയ, സൗത്ത് ഓസ്ട്രേലിയ, ടാസ്മാനിയ, നോർത്തേൺ ടെറിട്ടറി എന്നിവിടങ്ങളിൽ ഡബിൾ ഡെമെറിറ്റ് സമ്പ്രദായം നിലവിലില്ല. അവധിക്കാലത്തോ മറ്റ് സമയങ്ങളിലോ ഈ സംസ്ഥാനങ്ങളിൽ ഇത്തരം പ്രത്യേക ശിക്ഷാ രീതികൾ നടപ്പിലാക്കാറില്ല. എങ്കിലും, തിരക്കേറിയ ഈസ്റ്റർ സമയത്ത് റോഡ് സുരക്ഷ ഉറപ്പാക്കാൻ ഈ പ്രദേശങ്ങളിലും പോലീസ് പരിശോധന ശക്തമായിരിക്കും.
കൂടാതെ, ഏപ്രിൽ അവസാന വാരം വരുന്ന അൻസാക് ദിനത്തോടനുബന്ധിച്ചും (ഏപ്രിൽ 24 മുതൽ 27 വരെ) ഡബിൾ ഡെമെറിറ്റ് പരിശോധനകൾ ഉണ്ടാകുമെന്ന് അധികൃതർ അറിയിച്ചു.
