മെൽബൺ: വർഷങ്ങൾക്ക് മുൻപ് നടന്ന അപകടവുമായി ബന്ധപ്പെട്ട് തനിക്കെതിരെ ഫെഡറൽ കോടതിയിൽ ഫയൽ ചെയ്ത മാനനഷ്ടക്കേസിൽ മറുപടിയുമായി മുൻ വിക്ടോറിയൻ പ്രീമിയർ ഡാനിയൽ ആൻഡ്രൂസ് രംഗത്തെത്തി. തനിക്കെതിരെ കേസുമായി വന്ന റയാൻ മ്യൂൾമാൻ (Ryan Meuleman) തന്റെ സൽപ്പേരിന് ഉണ്ടായ കളങ്കം മാറ്റാനല്ല, മറിച്ച് പ്രശസ്തിക്ക് വേണ്ടിയാണ് ശ്രമിക്കുന്നതെന്ന് ഡാനിയൽ ആൻഡ്രൂസ് കോടതിയിൽ വാദിച്ചു. കേസിൽ തന്റെയും ഭാര്യ കാതറിൻ ആൻഡ്രൂസിന്റെയും പ്രതിരോധം (Defence) വ്യക്തമാക്കുന്ന രേഖകൾ ഫെബ്രുവരി 10-ന് അദ്ദേഹം കോടതിയിൽ സമർപ്പിച്ചു.
2013-ൽ മോർണിംഗ്ടൺ പെനിൻസുലയിലെ ബ്ലെയർഗൗറിയിൽ വെച്ച് ഡാനിയൽ ആൻഡ്രൂസും കുടുംബവും സഞ്ചരിച്ചിരുന്ന കാറും റയാൻ മ്യൂൾമാൻ എന്ന കൗമാരക്കാരൻ ഓടിച്ചിരുന്ന സൈക്കിളും തമ്മിൽ കൂട്ടിയിടിച്ച സംഭവമാണ് ‘ബൈക്ക് ബോയ്’ (Bike Boy) വിവാദമെന്നറിയപ്പെടുന്നത്. ഈ കേസിൽ ഡാനിയൽ ആൻഡ്രൂസ് പുറത്തിറക്കിയ സംയുക്ത പ്രസ്താവന തന്നെ അപകീർത്തിപ്പെടുത്തുന്നതാണെന്ന് ആരോപിച്ചാണ് റയാൻ ഇപ്പോൾ കോടതിയെ സമീപിച്ചിരിക്കുന്നത്. എന്നാൽ ഈ ആരോപണങ്ങൾ പൂർണ്ണമായും തള്ളിക്കളയുന്ന തായി ഡാനിയൽ ആൻഡ്രൂസ് അറിയിച്ചു.
ഈ സംഭവത്തെക്കുറിച്ച് മുൻപ് വിക്ടോറിയ പോലീസും അഴിമതി വിരുദ്ധ ഏജൻസിയായ ഐബാക്കും (IBAC) വിശദമായ അന്വേഷണം നടത്തി അവസാനിപ്പിച്ചതാണെന്നും തങ്ങൾ തെറ്റായൊന്നും ചെയ്തിട്ടില്ലെന്നും അദ്ദേഹം മറുപടിയിൽ ആവർത്തിച്ചു. പത്രപ്രവർത്തനത്തിന്റെ പേരിൽ ചിലർ കെട്ടിച്ചമച്ച ഗൂഢാലോചന സിദ്ധാന്തങ്ങളെ താൻ തള്ളിക്കളയുന്നുവെന്നും ഇതിലൂടെ പണം സമ്പാദിക്കാനാണ് എതിർഭാഗം ശ്രമിക്കുന്നതെന്നും അദ്ദേഹം ആരോപിച്ചു. 2026-ൽ സജീവമായിരിക്കുന്ന ഈ നിയമപോരാട്ടം ഓസ്ട്രേലിയൻ രാഷ്ട്രീയത്തിലും മാധ്യമങ്ങളിലും വലിയ ചർച്ചയായി തുടരുകയാണ്
