സിഡ്നി: ബീച്ചുകളിൽ നിന്ന് നേരിട്ട് നീന്തൽ വസ്ത്രം മാത്രം ധരിച്ച് ബസുകളിൽ കയറുന്നവർക്ക് നിയന്ത്രണമേർപ്പെടുത്തിക്കൊണ്ടുള്ള പുതിയ വസ്ത്രധാരണ ചട്ടം സിഡ്നിയിൽ വലിയ വിവാദത്തിന് തിരിതെളിക്കുന്നു. സിഡ്നിയിലെ പ്രശസ്തമായ നോർത്തേൺ ബീച്ചസ് കൗൺസിലിന് കീഴിലുള്ള ‘ഹോപ്പ്, സ്കിപ്പ് ആൻഡ് ജമ്പ്’ ബസ് സർവീസുകളിലാണ് യാത്രക്കാർ ശരീരം മറയ്ക്കുന്ന വസ്ത്രം ധരിക്കണമെന്ന കർശന നിർദ്ദേശം നൽകിയിരിക്കുന്നത്. മാൻലി ഉൾപ്പെടെയുള്ള പ്രധാന ബീച്ച് സ്റ്റോപ്പുകളിൽ, ബസുകളിൽ കയറുന്നതിന് മുൻപ് യാത്രക്കാർ വസ്ത്രം ധരിക്കണമെന്ന് ആവശ്യപ്പെടുന്ന ബോർഡുകൾ അധികൃതർ സ്ഥാപിച്ചു കഴിഞ്ഞു. നനഞ്ഞ നീന്തൽ വസ്ത്രങ്ങളുമായി ബസിലെ സീറ്റുകളിൽ ഇരിക്കുന്നത് ശുചിത്വമില്ലായ്മയ്ക്കും മറ്റ് യാത്രക്കാർക്ക് അസൗകര്യത്തിനും കാരണമാകുന്നു എന്ന പരാതിയെത്തുടർന്നാണ് ഈ നടപടി.
പുതിയ പരിഷ്കാരത്തെ അനുകൂലിച്ചും പ്രതികൂലിച്ചും നിരവധി പേർ രംഗത്തെത്തിയിട്ടുണ്ട്. പ്രത്യേകിച്ച് ജി-സ്ട്രിംഗ് മാതൃകയിലുള്ള നീന്തൽ വസ്ത്രങ്ങൾ ധരിച്ച് പൊതുഗതാഗത സംവിധാനങ്ങൾ ഉപയോഗിക്കുന്നത് മാന്യതയ്ക്ക് നിരക്കാത്തതാണെന്ന് ഒരു വിഭാഗം വാദിക്കുന്നു. എന്നാൽ ബീച്ച് സംസ്കാരത്തിന്റെ ഭാഗമായ വസ്ത്രധാരണത്തിന് നിയന്ത്രണം ഏർപ്പെടുത്തുന്നത് വ്യക്തിസ്വാതന്ത്ര്യത്തിന്മേലുള്ള കടന്നുകയറ്റമാണെന്നാണ് മറുവിഭാഗത്തിന്റെ ആക്ഷേപം. ഡ്രൈവർമാർക്ക് യാത്രക്കാരെ തടയാൻ അധികാരം നൽകുന്നത് അനാവശ്യ തർക്കങ്ങൾക്ക് വഴിവെക്കുമെന്നും വിമർശനമുണ്ട്. എന്നിരുന്നാലും, പൊതുജനാരോഗ്യം മുൻനിർത്തിയും സീറ്റുകൾ വൃത്തികേടാകുന്നത് ഒഴിവാക്കാനും ഇത്തരം നിയന്ത്രണങ്ങൾ അനിവാര്യമാണെന്നാണ് കൗൺസിൽ അധികൃതരുടെ നിലപാട്.
