കലിഫോർണിയ: അമേരിക്കയിലെ കലിഫോർണിയയിലുള്ള മഞ്ഞുപുതച്ച മലനിരകളിൽ സ്കീയിങ്ങിനിടെയുണ്ടായ അതിശക്തമായ മഞ്ഞിടിച്ചിലിൽ എട്ട് പേർ കൊല്ലപ്പെട്ടു. വിനോദസഞ്ചാരികളും സ്കീയിങ് വിദഗ്ധരും അടങ്ങുന്ന സംഘമാണ് അപകടത്തിൽപ്പെട്ടത്. പെട്ടെന്നുണ്ടായ പ്രകൃതിക്ഷോഭത്തിൽ കൂറ്റൻ മഞ്ഞുപാളികൾ താഴേക്ക് പതിക്കുകയായിരുന്നുവെന്ന് അധികൃതർ സ്ഥിരീകരിച്ചു.
സംഭവ സ്ഥലത്ത് നിന്നും എട്ട് പേരുടെ മൃതദേഹങ്ങൾ രക്ഷാപ്രവർത്തകർ കണ്ടെടുത്തു. 15 പേർ അടങ്ങുന്ന സംഘമാണ് അപകടത്തിൽപ്പെട്ടത്. ഇതിൽ ആറുപേരെ പരിക്കുകളോടെ രക്ഷപ്പെടുത്തി ആശുപത്രിയിൽ പ്രവേശിപ്പിച്ചു. കാണാതായ ഒരാൾക്കായി കനത്ത മഞ്ഞുവീഴ്ചയെയും തണുപ്പിനെയും അവഗണിച്ച് രക്ഷാപ്രവർത്തകർ തിരച്ചിൽ തുടരുകയാണ്.
മലനിരകളിലെ പ്രതികൂല കാലാവസ്ഥയും വീണ്ടും മഞ്ഞിടിച്ചിലുണ്ടാകാനുള്ള സാധ്യതയും രക്ഷാപ്രവർത്തനത്തിന് വലിയ വെല്ലുവിളിയാണ് ഉയർത്തുന്നത്. പ്രദേശം ഇപ്പോൾ പൂർണ്ണമായും അധികൃതരുടെ നിയന്ത്രണത്തിലാണ്. മരിച്ചവരുടെ കുടുംബാംഗങ്ങളെ വിവരം അറിയിച്ചുവരികയാണെന്നും കാലാവസ്ഥ മെച്ചപ്പെട്ടാൽ മാത്രമേ തുടർ നടപടികൾ വേഗത്തിലാക്കാൻ സാധിക്കൂ എന്നും പ്രാദേശിക ഭരണകൂടം അറിയിച്ചു
