മലപ്പുറം: സംസ്ഥാനത്ത് നിയമസഭാ തെരഞ്ഞെടുപ്പ് പ്രചാരണം ആവേശഭരിതമായി തുടരുന്നതിനിടെ മലപ്പുറം വൈലത്തൂരിൽ അപകടം. പ്രചാരണ ജാഥയ്ക്കിടെ പടക്കം പൊട്ടിച്ചപ്പോൾ കാറിലേക്ക് തീപ്പൊരി വീണ് തീപിടുത്തമുണ്ടായി. കാറിലുണ്ടായിരുന്നവർ സമയോചിതമായി പുറത്തിറങ്ങിയതിനാൽ വലിയൊരു ദുരന്തം ഒഴിവായി.ഞായറാഴ്ച വൈകുന്നേരമാണ് സംഭവം നടന്നത്. വൈലത്തൂർ ജങ്ഷനിൽ വച്ച് പ്രവർത്തകർ പടക്കം പൊട്ടിച്ച് ആഘോഷിക്കുന്നതിനിടെയായിരുന്നു അപകടം. പൊട്ടിച്ച പടക്കത്തിന്റെ അവശിഷ്ടങ്ങളും തീപ്പൊരിയും സമീപത്തുണ്ടായിരുന്ന കാറിലേക്ക് വീഴുകയായിരുന്നു. നിമിഷങ്ങൾക്കകം കാറിന്റെ മുൻഭാഗത്തുനിന്ന് പുക ഉയരുകയും തീ ആളിപ്പടരുകയും ചെയ്തു.കാറിന്റെ മുൻഭാഗം വലിയ തോതിൽ അഗ്നിക്കിരയായിട്ടുണ്ട്. ആർക്കും പരിക്കുകൾ റിപ്പോർട്ട് ചെയ്തിട്ടില്ല.തെരഞ്ഞെടുപ്പ് പ്രചാരണങ്ങളിൽ പടക്കം പൊട്ടിക്കുന്നതിനും ആൾക്കൂട്ടം നിയന്ത്രിക്കുന്നതിനും കൂടുതൽ ജാഗ്രത വേണമെന്ന് അധികൃതർ നിർദ്ദേശിച്ചു. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്.
തെരഞ്ഞെടുപ്പ് പ്രചാരണത്തിനിടെ പടക്കം വീണ് കാറിന് തീപിടിച്ചു; യാത്രക്കാർ രക്ഷപ്പെട്ടത് തലനാരിഴയ്ക്ക്
