മാക്ബുക്ക്, ഐമാക്, മാക് മിനി തുടങ്ങിയ ആപ്പിൾ ഉപകരണങ്ങൾ ഉപയോഗിക്കുന്നവർക്ക് സുരക്ഷാ മുന്നറിയിപ്പുമായി ഇന്ത്യൻ കമ്പ്യൂട്ടർ എമർജൻസി റെസ്പോൺസ് ടീം. മാക്ഒഎസ് സിസ്റ്റങ്ങളിലെ ചില സുരക്ഷാ പിഴവുകൾ ഹാക്കർമാർക്ക് വിവരങ്ങൾ മോഷ്ടിക്കാൻ പഴുതൊരുക്കുമെന്ന് സുരക്ഷാ ഏജൻസി കണ്ടെത്തി. ‘മീഡിയം’ കാഠിന്യ റേറ്റിംഗോടെയാണ് ഈ മുന്നറിയിപ്പ് പുറപ്പെടുവിച്ചിരിക്കുന്നത്. പ്രത്യേകം തയ്യാറാക്കിയ ചില ഫയലുകൾ തുറക്കുന്നതിലൂടെ ഉപയോക്താവിന്റെ സിസ്റ്റത്തിലേക്ക് വിദൂരത്തിരുന്നുള്ള ആക്രമണകാരികൾക്ക് പ്രവേശനം ലഭിക്കുമെന്നതാണ് പ്രധാന ഭീഷണി.
ആപ്പിളിന്റെ ‘പേജസ്’, ‘ക്വിക്ക്ലുക്ക്’എന്നീ ഘടകങ്ങളിലെ പിശകുകളാണ് ഈ ദുർബലതയ്ക്ക് കാരണമായി ചൂണ്ടിക്കാണിക്കുന്നത്. 15.1-ന് മുമ്പുള്ള പേജുകൾ, കീനോട്ട് പതിപ്പുകൾ ഉപയോഗിക്കുന്നവർക്കാണ് നിലവിൽ ഏറ്റവും കൂടുതൽ അപകടസാധ്യതയുള്ളത്. ഉപയോക്താക്കളെ പ്രലോഭിപ്പിച്ച് ഇത്തരം വ്യാജ ഫയലുകൾ തുറപ്പിക്കാനാണ് ഹാക്കർമാർ ശ്രമിക്കുന്നത്. ആപ്പിൾ സിസ്റ്റങ്ങളിൽ സുരക്ഷാ പ്രശ്നങ്ങൾ അപൂർവമാണെങ്കിലും, ദശലക്ഷക്കണക്കിന് ആളുകളെ ബാധിച്ചേക്കാവുന്ന ഈ പ്രശ്നത്തെ അതീവ ഗൗരവത്തോടെയാണ് സർക്കാർ കാണുന്നത്.
ഈ സുരക്ഷാ ഭീഷണി മറികടക്കാൻ ആപ്പിൾ ഇതിനകം തന്നെ അപ്ഡേറ്റുകൾ പുറത്തിറക്കിയിട്ടുണ്ട്. ഉപയോക്താക്കൾ എത്രയും വേഗം തങ്ങളുടെ സിസ്റ്റം അപ്ഡേറ്റ് ചെയ്യണമെന്ന് അധികൃതർ നിർദ്ദേശിക്കുന്നു. ഇതിനായി സെറ്റിംഗ്സ് തുറന്ന് ജനറൽ എന്നതിൽ പോയി സോഫ്റ്റ്വെയർ അപ്ഡേറ്റ് പരിശോധിക്കാവുന്നതാണ്. കാലഹരണപ്പെട്ട ആപ്പുകൾ അപ്ഡേറ്റ് ചെയ്യുന്നതിലൂടെയും വിശ്വസനീയമല്ലാത്ത സ്രോതസ്സുകളിൽ നിന്നുള്ള ഫയലുകൾ തുറക്കാതിരിക്കുന്നതിലൂടെയും ഈ സൈബർ ആക്രമണത്തിൽ നിന്ന് രക്ഷനേടാം.ചെയ്യേണ്ടത് ക്രമീകരണങ്ങൾ – പൊതുവായത് – സോഫ്റ്റ്വെയർ അപ്ഡേറ്റിലേക്ക് പോകുക എന്നതാണ്.
