വത്തിക്കാനിൽ വെച്ച് ലിയോ പതിനാലാമൻ മാർപാപ്പയെ നേരിൽ കാണുന്നതിനായി മുഖ്യമന്ത്രി പിണറായി വിജയനും ഡൽഹിയിലെ കേരളത്തിന്റെ പ്രത്യേക പ്രതിനിധി കെ.വി. തോമസിനും അനുമതി ലഭിച്ചു. മാർച്ച് 4-ന് രാവിലെ 10 മണിക്കാണ് മാർപാപ്പയെ കാണാനും ഹസ്തദാനം നടത്താനുമുള്ള സമയം അനുവദിച്ചിരിക്കുന്നത്. കൂടിക്കാഴ്ചയ്ക്കായി സമയം തേടിക്കൊണ്ട് കഴിഞ്ഞ ഡിസംബറിൽ തന്നെ സംസ്ഥാന സർക്കാർ ഇന്ത്യയിലെ അപ്പോസ്തലിക് സ്ഥാനപതിക്ക് ഔദ്യോഗികമായി കത്തയച്ചിരുന്നു.
സന്ദർശനത്തിന് വത്തിക്കാന്റെ പച്ചക്കൊടി ലഭിച്ചെങ്കിലും മുഖ്യമന്ത്രിയുടെ യാത്രയുടെ കാര്യത്തിൽ അന്തിമ തീരുമാനം ആയിട്ടില്ല. കേരളത്തിൽ നിയമസഭാ തെരഞ്ഞെടുപ്പ് അടുത്തിരിക്കുന്നതിനാൽ രാഷ്ട്രീയ തിരക്കുകളും ക്രമീകരണങ്ങളും സന്ദർശനത്തെ ബാധിച്ചേക്കാം. നിലവിൽ യാത്ര സംബന്ധിച്ച ഔദ്യോഗിക സ്ഥിരീകരണം മുഖ്യമന്ത്രിയുടെ ഓഫീസിൽ നിന്ന് ഉണ്ടാകാനിരിക്കുന്നതേയുള്ളൂ.
