പെർത്ത്: ഒരാളുടെ ചെറിയൊരു അശ്രദ്ധ എത്രത്തോളം വലിയ ദുരന്തത്തിന് കാരണമാകാം എന്നതിന്റെ ഞെട്ടിക്കുന്ന ഉദാഹരണമായി പെർത്തിലെ എലൻബ്രൂക്കിലുണ്ടായ കാട്ടുതീ. ജനവാസ മേഖലയിൽ വലിയ പരിഭ്രാന്തി സൃഷ്ടിച്ച ഈ തീപിടുത്തത്തിന് കാരണം അലക്ഷ്യമായി വലിച്ചെറിഞ്ഞ ഒരു സിഗരറ്റ് കുറ്റിയാണെന്ന് അധികൃതർ സ്ഥിരീകരിച്ചു.
കഴിഞ്ഞ ദിവസം ഉച്ചയ്ക്ക് 3 മണിയോടെയാണ് എലൻബ്രൂക്കിൽ തീപിടുത്തമുണ്ടായത്. ഉണങ്ങിയ പുല്ലുകളിൽ പിടിച്ച തീ കാറ്റിന്റെ വേഗതയിൽ അതിവേഗം പടരുകയായിരുന്നു. ഇതോടെ പ്രദേശം പുകപടലങ്ങളാൽ നിറയുകയും നിരവധി കുടുംബങ്ങൾക്ക് തങ്ങളുടെ വീടുകൾ ഉപേക്ഷിച്ച് സുരക്ഷിത സ്ഥാനങ്ങളിലേക്ക് മാറേണ്ടി വരികയും ചെയ്തു. തീ പടർന്നത് പ്രദേശത്ത് വലിയ ഗതാഗതക്കുരുക്കിനും കാരണമായി. ഉടൻ തന്നെ സ്ഥലത്തെത്തിയ അഗ്നിശമന സേനാംഗങ്ങൾ ഒരു മണിക്കൂറിനുള്ളിൽ തീ നിയന്ത്രണവിധേയമാക്കിയതിനാലാണ് വൻ ദുരന്തം ഒഴിവായത്.
ആദ്യം ഇതൊരു ബോധപൂർവ്വമുള്ള തീവെപ്പ് (Arson) ആണെന്നാണ് പോലീസ് സംശയിച്ചിരുന്നത്. കുറ്റവാളികളെ കണ്ടെത്താൻ സഹായിക്കുന്നവർക്ക് 25,000 ഡോളർ പ്രതിഫലവും അധികൃതർ പ്രഖ്യാപിച്ചിരുന്നു. എന്നാൽ വിശദമായ അന്വേഷണത്തിനൊടുവിൽ ഇതിൽ ദുരൂഹതകളില്ലെന്നും സിഗരറ്റ് കുറ്റിയിൽ നിന്ന് അബദ്ധത്തിൽ പടർന്നതാണെന്നും ഡിപ്പാർട്ട്മെന്റ് ഓഫ് ഫയർ ആൻഡ് എമർജൻസി സർവീസസ് (DFES) ഉദ്യോഗസ്ഥൻ ടിം മക്ഗ്രേഡ് വ്യക്തമാക്കി.
സംഭവത്തിൽ ആളപായമൊന്നുമില്ലെങ്കിലും എട്ടോളം വീടുകൾക്ക് നാശനഷ്ടങ്ങൾ സംഭവിച്ചു. വീടുകളുടെ വേലികളും ഗസീബോകളും മറ്റും കത്തിനശിച്ചിട്ടുണ്ട്. നിലവിൽ തീ പൂർണ്ണമായും അണച്ചതായും പ്രദേശം സുരക്ഷിതമാണെന്നും അധികൃതർ അറിയിച്ചു.
ഓസ്ട്രേലിയയിൽ ബുഷ്ഫയർ സീസൺ (Bushfire season) കടുക്കുന്ന സാഹചര്യത്തിൽ ഇത്തരം അശ്രദ്ധകൾ വലിയ വില നൽകേണ്ടി വരുന്ന കുറ്റകൃത്യങ്ങളായി മാറുകയാണ്. വാഹനങ്ങളിൽ യാത്ര ചെയ്യുമ്പോഴോ നടന്നു പോകുമ്പോഴോ സിഗരറ്റ് കുറ്റികൾ പുറത്തേക്ക് വലിച്ചെറിയുന്നത് കൊടും ക്രൂരതയാണെന്ന് പരിസ്ഥിതി പ്രവർത്തകർ ചൂണ്ടിക്കാട്ടുന്നു. ഭാഗ്യം കൊണ്ട് മാത്രമാണ് ഇവിടെ ജീവനപായം ഉണ്ടാകാതിരുന്നത്. ഇത്തരം കാര്യങ്ങളിൽ പൊതുജനങ്ങൾ കൂടുതൽ പൗരബോധവും ജാഗ്രതയും പുലർത്തണമെന്ന് അധികൃതർ കർശന നിർദ്ദേശം നൽകി
