ന്യൂഡൽഹി: രാജ്യത്ത് പാചകവാതക (എൽ.പി.ജി) വില കുത്തനെ വർധിക്കുന്ന സാഹചര്യത്തിൽ കേന്ദ്ര സർക്കാരിനെതിരെ രൂക്ഷവിമർശനവുമായി കോൺഗ്രസ് അധ്യക്ഷൻ മല്ലികാർജുൻ ഖാർഗെ. അന്താരാഷ്ട്ര വിപണിയിലെ മാറ്റങ്ങൾ മുൻകൂട്ടി കണ്ട് ആവശ്യമായ മുൻകരുതലുകൾ എടുക്കുന്നതിൽ സർക്കാർ പരാജയപ്പെട്ടുവെന്ന് അദ്ദേഹം ആരോപിച്ചു.
യുദ്ധസാഹചര്യങ്ങളും ആഗോള പ്രതിസന്ധികളും കാരണം ഇന്ധനവില ഉയരാൻ സാധ്യതയുണ്ടെന്ന് നേരത്തെ തന്നെ വ്യക്തമായിരുന്നു. എന്നാൽ ഇത്തരം സാഹചര്യങ്ങളെ നേരിടാനോ സാധാരണക്കാർക്ക് ആശ്വാസം നൽകാനോ ഉള്ള നടപടികൾ സ്വീകരിക്കുന്നതിന് പകരം സർക്കാർ നിസ്സംഗത പാലിക്കുകയാണെന്ന് ഖാർഗെ പറഞ്ഞു. “തിരഞ്ഞെടുപ്പ് കഴിഞ്ഞാലുടൻ ജനങ്ങളെ കൊള്ളയടിക്കുന്നതാണ് ബിജെപി സർക്കാരിന്റെ രീതി” എന്നും അദ്ദേഹം കുറ്റപ്പെടുത്തി.
വിലക്കയറ്റം മൂലം സാധാരണക്കാരുടെ കുടുംബ ബജറ്റ് താളം തെറ്റിയിരിക്കുകയാണ്. സബ്സിഡികൾ വെട്ടിക്കുറച്ചതും വില അടിക്കടി വർധിപ്പിക്കുന്നതും ദരിദ്ര-മധ്യവർഗ കുടുംബങ്ങളെ കഷ്ടത്തിലാക്കുന്നു. ജനങ്ങളുടെ ദുരിതം കാണാതെ കോർപ്പറേറ്റുകളെ സഹായിക്കുന്ന നിലപാടാണ് കേന്ദ്രം സ്വീകരിക്കുന്നതെന്നും, പാചകവാതക വില ഉടൻ കുറയ്ക്കണമെന്നും അദ്ദേഹം ആവശ്യപ്പെട്ടു. വരും ദിവസങ്ങളിൽ വിലക്കയറ്റത്തിനെതിരെ ശക്തമായ പ്രതിഷേധ പരിപാടികൾ സംഘടിപ്പിക്കുമെന്നും ഖാർഗെ കൂട്ടിച്ചേർത്തു.
