ഇടുക്കി: കൊച്ചി-ധനുഷ്കോടി ദേശീയപാത 85-ൽ അടിമാലി കമ്പിലൈന് സമീപം നിർമ്മാണ പ്രവർത്തനങ്ങളിൽ ഏർപ്പെട്ടിരുന്ന ക്രെയിൻ മറിഞ്ഞ് അപകടം. റോഡരികിലെ ഓടയിൽ വലിയ കോൺക്രീറ്റ് ബ്ലോക്കുകൾ സ്ഥാപിക്കുന്നതിനിടെയാണ് ക്രെയിൻ നിയന്ത്രണം വിട്ട് പാതയോരത്തേക്ക് മറിഞ്ഞത്.ദേശീയപാത വികസനത്തിന്റെ ഭാഗമായി ഓടയിൽ കോൺക്രീറ്റ് സ്ലാബുകൾ ഇറക്കുന്നതിനിടെയാണ് ക്രെയിൻ മറിഞ്ഞത്.
ക്രെയിൻ മറിഞ്ഞതിനെത്തുടർന്ന് സമീപത്തെ വീടിന് ഭാഗികമായി കേടുപാടുകൾ സംഭവിച്ചു. എന്നാൽ അപകടസമയത്ത് വീടിന് സമീപത്തോ ഓടയുടെ പക്കലോ ആളുകൾ ഇല്ലാതിരുന്നതിനാൽ വലിയൊരു ദുരന്തം ഒഴിവായി. ആർക്കും പരിക്കേറ്റതായി റിപ്പോർട്ടുകളില്ല.
അപകടത്തിന് പിന്നാലെ ക്രെയിൻ മാറ്റുന്നതിനും ഗതാഗതം പൂർണ്ണമായും പുനഃസ്ഥാപിക്കുന്നതിനുമുള്ള നടപടികൾ അധികൃതർ സ്വീകരിച്ചു.ദേശീയപാതയിലെ നിർമ്മാണ പ്രവർത്തനങ്ങൾക്കിടെ സുരക്ഷാ മാനദണ്ഡങ്ങൾ പാലിക്കുന്നതിലെ വീഴ്ചയാണോ അപകടത്തിന് കാരണമായതെന്ന് പരിശോധിച്ചുവരികയാണ്.
