ക്വീൻസ്ലൻഡ്: നോർത്ത് ക്വീൻസ്ലൻഡിൽ ആഞ്ഞടിച്ച നരേൽ ചുഴലിക്കാറ്റിനെത്തുടർന്ന് കേപ് യോർക്ക് ഉപദ്വീപിൽ ശുചീകരണ പ്രവർത്തനങ്ങൾ ആരംഭിച്ചു. ജനവാസ കേന്ദ്രങ്ങളെ കാര്യമായി ബാധിക്കാതെ കാറ്റ് കടന്നുപോയത് വലിയ ആശ്വാസമായെന്ന് ക്വീൻസ്ലൻഡ് പ്രീമിയർ ഡേവിഡ് ക്രിസാഫുള്ളി പറഞ്ഞു. കാറ്റഗറി രണ്ടിലേക്ക് താഴ്ന്ന ചുഴലിക്കാറ്റ് ഔറുകുന്റെ തെക്ക് ഭാഗത്തുകൂടി ഇന്ന് പുലർച്ചെയാണ് തീരം വിട്ടത്.
കോയൻ, ലോക്ക്ഹാർട്ട് റിവർ എന്നീ പ്രധാന നഗരങ്ങൾക്കിടയിലൂടെ കടന്നുപോയ കാറ്റ് കനത്ത മഴയ്ക്കും കാറ്റിനും കാരണമായി. ലോക്ക്ഹാർട്ട് റിവറിൽ മണിക്കൂറിൽ 115 കിലോമീറ്റർ വേഗതയിലും വീപ്പയിൽ 109 കിലോമീറ്റർ വേഗതയിലുമാണ് കാറ്റ് വീശിയത്. വീപ്പയിൽ ഒറ്റരാത്രികൊണ്ട് 217 മില്ലിമീറ്റർ മഴ ലഭിച്ചു. മേഖലയിലെ ചിലയിടങ്ങളിൽ 400 മില്ലിമീറ്ററോളം മഴ രേഖപ്പെടുത്തിയതോടെ നദികളും തോടുകളും കരകവിഞ്ഞൊഴുകുകയാണ്. വീപ്പ തീരത്ത് അഞ്ച് മീറ്ററിലധികം ഉയരത്തിൽ തിരമാലകൾ അടിച്ചതായും റിപ്പോർട്ടുണ്ട്.
ചുഴലിക്കാറ്റിൽ ആർക്കും ഗുരുതരമായ പരിക്കുകൾ റിപ്പോർട്ട് ചെയ്തിട്ടില്ല. എങ്കിലും മരങ്ങൾ കടപുഴകി വീണും വൈദ്യുതി ബന്ധം തകരാറിലായും കാര്യമായ നാശനഷ്ടങ്ങൾ സംഭവിച്ചിട്ടുണ്ട്. പെനിൻസുല ഡെവലപ്പ്മെന്റ് റോഡ് തകർന്നത് ഉൾപ്പെടെ ഗതാഗത തടസ്സങ്ങൾ നേരിടുന്നതിനാൽ ഒറ്റപ്പെട്ട കമ്മ്യൂണിറ്റികളിലേക്ക് ഭക്ഷണവും ഇന്ധനവും എത്തിക്കുന്നത് വെല്ലുവിളിയാണ്. നിലവിൽ കുക് ടൗൺ വിമാനത്താവളം വഴിയുള്ള വ്യോമയാനം മാത്രമാണ് ഏക യാത്രാമാർഗ്ഗം. പ്രിൻസസ് ഷാർലറ്റ് ബേയിൽ കാണാതായ ബോട്ട് സുരക്ഷിതമാണെന്ന് അധികൃതർ സ്ഥിരീകരിച്ചു.
സ്കൂളുകൾ തുറക്കുന്ന കാര്യത്തിൽ നാളെ വൈകുന്നേരം അഞ്ച് മണിയോടെ തീരുമാനമുണ്ടാകും. ക്വീൻസ്ലൻഡ് തീരം വിട്ട നരേൽ, ഗൾഫ് ഓഫ് കാർപെന്റേറിയയിലൂടെ ശക്തിപ്രാപിച്ച് ഇന്ന് വൈകുന്നേരത്തോടെ നോർത്തേൺ ടെറിട്ടറിയിൽ ആഞ്ഞടിക്കുമെന്നാണ് കാലാവസ്ഥാ നിരീക്ഷകർ നൽകുന്ന മുന്നറിയിപ്പ്.
