പശ്ചിമ ബംഗാളിലെ മമത ബാനർജി സർക്കാരിനെതിരെ രൂക്ഷമായ വിമർശനങ്ങളുമായി പ്രധാനമന്ത്രി നരേന്ദ്ര മോദി രംഗത്തെത്തി. സിംഗൂരിൽ നടന്ന തിരഞ്ഞെടുപ്പ് റാലിയിൽ സംസാരിക്കവെയാണ് തൃണമൂൽ കോൺഗ്രസ് ഭരണത്തിൽ സംസ്ഥാനത്തെ സ്ത്രീകൾ സുരക്ഷിതരല്ലെന്നും വിദ്യാഭ്യാസ മേഖല അഴിമതിക്കാരുടെ പിടിയിലാണെന്നും അദ്ദേഹം കുറ്റപ്പെടുത്തിയത്. സന്ദേശ്ഖലി സംഭവവും ആർ.ജി. കർ മെഡിക്കൽ കോളേജ് വിദ്യാർത്ഥിനിയുടെ ദാരുണമായ കൊലപാതകവും ചൂണ്ടിക്കാട്ടിയ അദ്ദേഹം, ഇത്തരം ക്രൂരതകൾ അവസാനിപ്പിക്കാൻ ബിജെപിക്ക് വോട്ട് ചെയ്യണമെന്ന് ജനങ്ങളോട് അഭ്യർത്ഥിച്ചു.
ബംഗാളിലെ നിലവിലെ സാഹചര്യം ‘ജംഗിൾ രാജ്’ ആണെന്നും ഇത് അവസാനിപ്പിച്ച് ബിജെപിയുടെ നല്ല ഭരണം കൊണ്ടുവരേണ്ടത് അത്യാവശ്യമാണെന്നും മോദി പറഞ്ഞു. ഈശ്വർ ചന്ദ്ര വിദ്യാസാഗറെപ്പോലുള്ള സാമൂഹിക പരിഷ്കർത്താക്കളുടെ പാത പിന്തുടർന്ന് സംസ്ഥാനത്തെ രക്ഷിക്കണം. ദേശീയ സുരക്ഷ, വികസനം, യുവജനങ്ങളുടെ ഭാവി എന്നിവയിൽ തൃണമൂൽ കോൺഗ്രസ് വിട്ടുവീഴ്ച ചെയ്തതായും ഓരോ അധ്യാപകന്റെയും ജോലി സുരക്ഷിതമാക്കുമെന്നും അദ്ദേഹം റാലിയിൽ ഉറപ്പുനൽകി. വോട്ടുബാങ്ക് രാഷ്ട്രീയത്തിനായി തൃണമൂൽ സർക്കാർ നുഴഞ്ഞുകയറ്റത്തെ പ്രോത്സാഹിപ്പിക്കുകയാണെന്നും അതിർത്തിയിൽ വേലികെട്ടാൻ പോലും ഭൂമി നൽകുന്നില്ലെന്നും മോദി ആരോപിച്ചു. വ്യാജ തിരിച്ചറിയൽ കാർഡുകളും ആധാർ കാർഡുകളും ഉപയോഗിച്ച് അനധികൃത കുടിയേറ്റക്കാരെ സഹായിക്കുന്ന നിലപാടാണ് സർക്കാരിന്റേത്. പിഎം ശ്രീ സ്കൂളുകൾ പോലുള്ള കേന്ദ്ര പദ്ധതികൾ തടയുന്നത് വഴി കുട്ടികൾക്ക് മികച്ച വിദ്യാഭ്യാസം നിഷേധിക്കപ്പെടുകയാണെന്നും അദ്ദേഹം കൂട്ടിച്ചേർത്തു.
മത്സ്യത്തൊഴിലാളികൾക്കുള്ള കേന്ദ്ര ആനുകൂല്യങ്ങൾ ഉൾപ്പെടെയുള്ള വികസന പദ്ധതികൾ സംസ്ഥാന സർക്കാരിന്റെ നിസ്സഹകരണം മൂലം ജനങ്ങളിലേക്ക് എത്തുന്നില്ലെന്നും പ്രധാനമന്ത്രി കുറ്റപ്പെടുത്തി. തൃണമൂൽ കോൺഗ്രസ് ഭരണത്തിന് അന്ത്യം കുറിച്ചാൽ മാത്രമേ ബംഗാളിന്റെ സമഗ്രമായ പുരോഗതി സാധ്യമാകൂ എന്നും വരാനിരിക്കുന്ന തിരഞ്ഞെടുപ്പിൽ ബിജെപിയെ അധികാരത്തിലേറ്റണമെന്നും അദ്ദേഹം ജനങ്ങളോട് ആഹ്വാനം ചെയ്തു.
