പാലക്കാട്: ലോറിയിടിച്ച് ഭിന്നശേഷിക്കാരനായ യുവാവിന് പരിക്കേറ്റു. പാലക്കാട് ജില്ലയിലെ കൊപ്പം തിരുവേഗപ്പുറയിലാണ് അപകടം സംഭവിച്ചത്. കഴിഞ്ഞ ദിവസം വൈകുന്നേരം 3.20-ഓടെയാണ് സംഭവം നടന്നത്. കാൽനടയാത്രക്കാരനായിരുന്ന ഭിന്നശേഷിക്കാരനെ ലോറി ഇടിച്ചിടുകയായിരുന്നു. അപകടത്തിന് ശേഷം ലോറി നിർത്താതെ ഓടിച്ചുപോയി. യുവാവിന്റെ കൈയ്ക്കാണ് പരിക്കേറ്റത്. ഇദ്ദേഹത്തിന്റെ ആരോഗ്യനില നിലവിൽ തൃപ്തികരമാണെന്ന് ആശുപത്രി അധികൃതർ അറിയിച്ചു.യുവാവിന്റെ കുടുംബം നൽകിയ പരാതിയിൽ പോലീസ് കേസെടുത്ത് അന്വേഷണം ആരംഭിച്ചു. പരിസരത്തെ സിസിടിവി (CCTV) ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിൽ അപകടമുണ്ടാക്കിയ വാഹനത്തിന്റെ ഉടമയെ പോലീസ് കണ്ടെത്തിയിട്ടുണ്ട്.വാഹന ഉടമയെയും ഡ്രൈവറെയും കേന്ദ്രീകരിച്ച് പോലീസ് കൂടുതൽ നടപടികൾ സ്വീകരിച്ചുവരികയാണ്. പരിക്കേറ്റ യുവാവിനെ പ്രാഥമിക ചികിത്സയ്ക്ക് ശേഷം വീട്ടിലേക്ക് മാറ്റി.
വാഹനമിടിച്ച് ഭിന്നശേഷിക്കാരന് പരിക്ക്; ലോറി നിർത്താതെ പോയി
