ചിത്രം ജനുവരിയില് തീയേറ്ററുകളില് റിലീസിന് എത്തും
2020ല് പുറത്തിറങ്ങിയ ദ്രൗപതി എന്ന ചിത്രത്തിന്റെ തുടര്ച്ചയായി സംവിധായകന് മോഹന്.ജി, യുവതാരം റിച്ചാര്ഡ് റിഷിയുമായി വീണ്ടും ഒന്നിക്കുന്ന ചിത്രത്തിന്റെ ആദ്യ ഗാനം റിലീസ് ആയി. ‘ദ്രൗപതി2’ എന്ന് പേരിട്ടിരിക്കുന്ന പാന് ഇന്ത്യന് ചിത്രത്തിനേ ഏറെ പ്രതീക്ഷയോടെയാണ് ആരാധകര് കാണുന്നത്. ആര്യന്, അദ്ദേഴ്സ്, ജെ.എസ്.കെ, പാപനാശം, വിശ്വരൂപം2, രാക്ഷസന്, വലിമൈ തുടങ്ങിയ ചിത്രങ്ങളിലൂടെ പ്രമുഖനായ ജിബ്രാന് വൈബോധയാണ് ഈ പാന് ഇന്ത്യന് ചിത്രത്തിനും സംഗീതം നല്കിയിരിക്കുന്നത്. ‘എന് പ്രിയനെ’ എന്ന് തുടങ്ങുന്ന വരികളിലുള്ള ഗാനം സംഗീത സംവിധായകനൊപ്പം നമിത ബാബുവും ചേര്ന്നാണ് ആലപിച്ചിരിക്കുന്നത്. നേതാജി പ്രൊഡക്ഷന്സിന്റെ ബാനറില് സോള ചക്രവര്ത്തിയാണ് ചിത്രം നിര്മ്മിച്ചിരിക്കുന്നത്.
ഹൊയ്സാള ചക്രവര്ത്തി വീര ബല്ലാല മൂന്നാമന്റെയും കടവ സാമ്രാജ്യത്തിന്റെയും മുഗള് കാലഘട്ടത്തിലെ കഥ പറയുന്ന പാന് ഇന്ത്യന് ഹിസ്റ്റോറിക്കല് സിനിമയില് ടൈറ്റില് റോളില് എത്തുന്നത് മലയാളികൂടിയായ രക്ഷണ ഇന്ദുചൂഡന് ആണ്. തമിഴില് ഇറങ്ങിയ മാര്ഗഴി തിങ്കള്, മരുതം എന്നീ സിനിമകളിലൂടെ പ്രമുഖയാണ് രക്ഷണ. ദ്രൗപതി ദേവിയായി വേഷമിടുന്ന അവരുടെ ക്യാരക്ടര് പോസ്റ്റര് ഇതിനോടകം റിലീസ് ചെയ്തിരുന്നു. പതിനാലാം നൂറ്റാണ്ടിലെ കഥപറയുന്ന ദ്രൗപതി2- ല് തമിഴ്നാടിനെ പിടിച്ചുകുലുക്കിയ മുഗള് അധിനിവേശം പോലുള്ള ചരിത്രം അടിസ്ഥാനമാക്കി, പക്കാ ഹിസ്റ്റോറിക്കല് ആക്ഷന് ഡ്രാമയായിട്ടാണ് ഒരുക്കിയിരിക്കുന്നത്. ദ്രൗപതി, രുദ്ര താണ്ഡവം എന്നിവയ്ക്ക് ശേഷം റിച്ചാര്ഡ് ഋഷിയും മോഹന് ജിയും തമ്മിലുള്ള മൂന്നാമത്തെ ചിത്രമാണ് ദ്രൗപതി 2. ലഹാരി മ്യൂസിക് ആണ് ചിത്രത്തിന്റെ മ്യൂസിക് റൈറ്റ്സ് സ്വന്തമാക്കിയിരിക്കുന്നത്. സത്യ, രവി എന്നിവരാണ് ചിത്രത്തിന്റെ സഹനിര്മാതാക്കള്.
മുംബൈയില് ആരംഭിച്ച് അരിയല്ലൂരില് അവസാനിച്ച ചിത്രത്തിന്റെ ഷൂട്ടിംഗ് പൂര്ത്തിയായി. 2026 ജനുവരിയില് ലോകമെമ്പാടുമായി റിലീസ് ചെയ്യുമെന്ന് നിര്മ്മാതാക്കള് അറിയിച്ചു. മലയാളം, തമിഴ്, തെലുങ്ക്, കന്നഡ, ഹിന്ദി എന്നീ 05 ഭാഷകളിലായാണ് ചിത്രം ഒരുക്കിയിരിക്കുന്നത്. നട്ടി നടരാജ്, വൈ.ജി മഹേന്ദ്രന്, ഭരണി (നാടോടികള്), ശരവണ സുബ്ബയ്യ, വേല രാമമൂര്ത്തി, ചിരാഗ് ജനി, ദിനേശ് ലാംബ, ഗണേഷ് ഗൗരംഗ്, ദിവി, ദേവയാനി ശര്മ്മ, അരുണോദയന്, ജയവേല് എന്നിവരും ദ്രൗപതി 2-ല് പ്രധാന കഥാപാത്രങ്ങളെ അവതരിപ്പിക്കുന്നു. ഛായാഗ്രാഹകന്: ഫിലിപ്പ് ആര്. സുന്ദര്, എഡിറ്റര്: ദേവരാജ്, കലാസംവിധായകന്: കമല്നാഥന്, പ്രൊഡക്ഷന് എക്സിക്യൂട്ടീവ്: എസ്.മുരുകന്, നൃത്തസംവിധായകന്: തനിക ടോണി, സ്റ്റണ്ട് കോ-ഓര്ഡിനേറ്റര്: ആക്ഷന് സന്തോഷ്, സ്റ്റില്സ്: തേനി സീനു, പി .ആര്.ഓ: പി.ശിവപ്രസാദ്, ഡിജിറ്റല് മാര്ക്കറ്റിംഗ്: ബി.സി ക്രിയേറ്റീവ്സ് എന്നിവരാണ് മറ്റ് അണിയറ പ്രവര്ത്തകര്.
