പത്തനംതിട്ട: സംസ്ഥാനത്തെ നടുക്കിയ എലന്തൂർ നരബലി കേസിൽ മൂന്ന് വർഷങ്ങൾക്ക് ശേഷം വിചാരണ നടപടികൾ ആരംഭിച്ചു. കേസിലെ പ്രതികളായ മുഹമ്മദ് ഷാഫി, ഭഗവൽ സിംഗ്, ഭാര്യ ലൈല എന്നിവരെ കോടതിയിൽ ഹാജരാക്കി വിചാരണ ആരംഭിച്ചതായി കോടതിവൃത്തങ്ങൾ അറിയിച്ചു.
2022 ഒക്ടോബറിലാണ് പത്തനംതിട്ട ജില്ലയിലെ എലന്തൂരിൽ മനുഷ്യബലി നടത്തിയെന്ന പേരിൽ രണ്ട് സ്ത്രീകളെ ക്രൂരമായി കൊലപ്പെടുത്തിയ സംഭവം പുറത്തുവന്നത്. സമ്പത്ത് ലഭിക്കുമെന്ന വിശ്വാസം വളർത്തി താന്ത്രിക ചടങ്ങുകളുടെ പേരിൽ നരബലി നടത്തണമെന്ന് മുഹമ്മദ് ഷാഫി ഭഗവൽ സിംഗിനെയും ഭാര്യ ലൈലയെയും വിശ്വസിപ്പിച്ചതായാണ് അന്വേഷണത്തിൽ കണ്ടെത്തിയത്.കടവന്ത്ര സ്വദേശിനിയായ പത്മയും പെരുമ്പാവൂർ സ്വദേശിനിയായ റോസ്ലിനുമാണ് കേസിലെ ഇരകൾ. ലോട്ടറി വിൽപ്പനക്കാരികളായ ഇവരെ ജോലി വാഗ്ദാനം ചെയ്ത് എലന്തൂരിലെ ഭഗവൽ സിംഗിന്റെ വീട്ടിലെത്തിച്ച ശേഷം കൊലപ്പെടുത്തിയെന്നാണ് പൊലീസ് കുറ്റപത്രത്തിൽ വ്യക്തമാക്കുന്നത്.
സംഭവത്തെ തുടർന്ന് കേരള പൊലീസ് പ്രത്യേക അന്വേഷണസംഘം രൂപീകരിച്ച് അന്വേഷണം നടത്തി പ്രതികളെ അറസ്റ്റ് ചെയ്തിരുന്നു. അപഹരണം, കൊലപാതകം ഉൾപ്പെടെ വിവിധ കുറ്റങ്ങൾ ചുമത്തി കോടതിയിൽ കുറ്റപത്രം സമർപ്പിച്ചു.മൂന്ന് വർഷങ്ങൾക്ക് ശേഷം വിചാരണ ആരംഭിച്ചതോടെ സംസ്ഥാനത്ത് ഏറെ ശ്രദ്ധേയമായ കേസിലെ കോടതി നടപടികൾ ഇനി തുടരും.
