കോഴിക്കോട്: ജില്ലയിലെ വോട്ടെടുപ്പ് നടപടികൾക്കായി വോട്ടിംഗ് യന്ത്രങ്ങളും മറ്റ് അവശ്യസാധനങ്ങളും വിതരണം ചെയ്യുന്ന നടപടികൾ ആരംഭിച്ചു. കോഴിക്കോട് ജില്ലയിലെ 13 വിതരണ-സ്വീകരണ കേന്ദ്രങ്ങൾ വഴിയാണ് വിതരണം പുരോഗമിക്കുന്നത്. പോളിംഗ് സാമഗ്രികൾ കൈപ്പറ്റുന്ന ഉദ്യോഗസ്ഥരെ അതത് പോളിംഗ് ബൂത്തുകളിൽ എത്തിക്കുന്നതിനായി പ്രത്യേക വാഹന സൗകര്യങ്ങൾ ജില്ലാ ഭരണകൂടം ഏർപ്പെടുത്തിയിട്ടുണ്ട്.
ഓരോ പോളിംഗ് സ്റ്റേഷനിലേക്കും നിയോഗിക്കപ്പെട്ടിട്ടുള്ള ഉദ്യോഗസ്ഥരുടെ വിവരങ്ങൾ വിതരണ കേന്ദ്രങ്ങളിൽ വ്യക്തമായി പ്രദർശിപ്പിച്ചിട്ടുണ്ട്. നടപടികൾ സുഗമമാക്കുന്നതിനായി വിതരണ കേന്ദ്രങ്ങളിൽ ഉദ്യോഗസ്ഥർക്കായി ഹെൽപ്പ് ഡെസ്കുകൾ പ്രവർത്തിക്കുന്നുണ്ട്. ഇതിന് പുറമെ കുടിവെള്ളം, ലഘുഭക്ഷണശാലകൾ, അടിയന്തര ചികിത്സാ സൗകര്യങ്ങൾ എന്നിവയും വിതരണ കേന്ദ്രങ്ങളിൽ സജ്ജമാക്കിയിട്ടുണ്ട്. സുരക്ഷാ പരിശോധനകൾ പൂർത്തിയാക്കി പോളിംഗ് സംഘങ്ങൾ വൈകുന്നേരത്തോടെ തങ്ങളുടെ നിയുക്ത കേന്ദ്രങ്ങളിൽ എത്തിച്ചേരും.
