ന്യൂഡൽഹി: ഇന്ത്യയുടെ ഊർജസുരക്ഷയെ ബാധിക്കുന്ന നിലവിലെ സാഹചര്യങ്ങളെക്കുറിച്ച് രാജ്യസഭയിൽ ചർച്ച നടത്തണം എന്നാവശ്യപ്പെട്ട് പ്രതിപക്ഷ നേതാവും കോൺഗ്രസ് അധ്യക്ഷനുമായ മല്ലികാർജുൻ ഖർഗെ നോട്ടീസ് നൽകി. രാജ്യസഭയിൽ ചുരുങ്ങിയ ദൈർഘ്യമുള്ള ചര്ച്ച അനുവദിക്കണമെന്നാവശ്യപ്പെട്ടാണ് അദ്ദേഹം നോട്ടീസ് സമർപ്പിച്ചത്.
പശ്ചിമേഷ്യയിലെ സംഘർഷാവസ്ഥ ശക്തമാകുന്നതോടെ ഇന്ത്യയുടെ ഊർജവിതരണത്തിലും സാമ്പത്തിക സ്ഥിരതയിലും പ്രതിഫലനം ഉണ്ടാകുമെന്ന് ഖർഗെ ചൂണ്ടിക്കാട്ടി. അതിനാൽ വിഷയത്തിൽ പാർലമെന്റിൽ അടിയന്തരമായി ചർച്ച നടത്തേണ്ടതുണ്ടെന്നും അദ്ദേഹം ആവശ്യപ്പെട്ടു. ഇന്ത്യയ്ക്ക് ആവശ്യമായ ക്രൂഡ് ഓയിലിന്റെ വലിയൊരു പങ്ക് പശ്ചിമേഷ്യൻ രാജ്യങ്ങളിൽ നിന്നാണ് ഇറക്കുമതി ചെയ്യുന്നത്. അതിനാൽ ആ മേഖലയിലെ രാഷ്ട്രീയ-സൈനിക സംഘർഷങ്ങൾ ഇന്ത്യയുടെ ഊർജസുരക്ഷയെ നേരിട്ട് ബാധിക്കാനുള്ള സാധ്യതയുണ്ടെന്ന് അദ്ദേഹം മുന്നറിയിപ്പ് നൽകി.
പാർലമെന്റിന്റെ ബജറ്റ് സമ്മേളനത്തിന്റെ രണ്ടാംഘട്ടം ആരംഭിച്ച സാഹചര്യത്തിലാണ് ഈ വിഷയത്തിൽ അടിയന്തര ചർച്ച ആവശ്യപ്പെട്ട് ഖർഗെ രാജ്യസഭ സെക്രട്ടേറിയറ്റിന് നോട്ടീസ് നൽകിയിരിക്കുന്നത്.
