മലപ്പുറം: മുസ്ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങൾക്കെതിരെ സമൂഹമാധ്യമങ്ങൾ വഴി വ്യാജ ലൈംഗികാരോപണം ഉന്നയിച്ച് പ്രചാരണം നടത്തിയ സംഭവത്തിൽ പോലീസ് കേസെടുത്തു. തങ്ങളുടെ വ്യക്തിത്വത്തെ ഹനിക്കുന്ന രീതിയിൽ തെറ്റായ വിവരങ്ങൾ പ്രചരിപ്പിച്ചു എന്ന പരാതിയുടെ അടിസ്ഥാനത്തിലാണ് നടപടി.
അപകീർത്തികരമായ സന്ദേശങ്ങളും വ്യാജ ആരോപണങ്ങളുമാണ് സമൂഹമാധ്യമങ്ങളിലെ വിവിധ ഗ്രൂപ്പുകൾ വഴി വ്യാപകമായി പ്രചരിച്ചത്. രാഷ്ട്രീയമായ വിരോധം വച്ച് തങ്ങളെ വ്യക്തിഹത്യ ചെയ്യാനുള്ള ബോധപൂർവ്വമായ ശ്രമമാണിതെന്ന് കാണിച്ച് മുസ്ലിം ലീഗ് പ്രവർത്തകർ പോലീസിൽ പരാതി നൽകുകയായിരുന്നു.പരാതി ഗൗരവമായി പരിഗണിച്ച മലപ്പുറം പോലീസ്, ഐടി ആക്ട് പ്രകാരവും അപകീർത്തിപ്പെടുത്തിയതിനും കേസെടുത്തു.
വ്യാജ സന്ദേശങ്ങൾ നിർമ്മിച്ചവരെയും അത് പ്രചരിപ്പിച്ചവരെയും കണ്ടെത്താൻ സൈബർ സെൽ അന്വേഷണം ഊർജിതമാക്കിയിട്ടുണ്ട്. ഇത്തരം വ്യാജ പ്രചാരണങ്ങൾ നടത്തുന്നവർക്കെതിരെ കർശന നിയമനടപടി സ്വീകരിക്കുമെന്ന് പോലീസ് അറിയിച്ചു.സാമൂഹികരംഗത്ത് സജീവമായ വ്യക്തിത്വങ്ങൾക്കെതിരെ ഇത്തരത്തിലുള്ള ഹീനമായ പ്രചാരണങ്ങൾ നടത്തുന്നത് അനുവദിക്കാനാവില്ലെന്ന് ലീഗ് നേതൃത്വവും വ്യക്തമാക്കി.
