ലോംഗ്റീച്ച്: ക്വീൻസ്ലൻഡിലെ കനത്ത മഴയെത്തുടർന്നുണ്ടായ പ്രളയജലം സംസ്ഥാനത്തിന്റെ പടിഞ്ഞാറൻ മേഖലകളിലേക്ക് കുതിക്കുന്നു. ഔട്ട്ബാക്ക് നഗരമായ ലോംഗ്റീച്ചിൽ ഇന്ന് രാത്രിയോടെ പ്രളയം അതിന്റെ പരമാവധിയിൽ എത്തുമെന്നാണ് റിപ്പോർട്ട്. നഗരത്തിൽ ഏകദേശം 6.7 മീറ്റർ വരെ ജലനിരപ്പ് ഉയർന്നേക്കാമെന്ന് അധികൃതർ മുന്നറിയിപ്പ് നൽകുന്നു.
ഇന്ന് പുലർച്ചെ മുതൽ തന്നെ തെരുവുകളിലേക്ക് പ്രളയജലം ഇരച്ചുകയറാൻ തുടങ്ങിയിരുന്നു. പലയിടങ്ങളിലും റോഡുകൾ പൂർണ്ണമായും ഒറ്റപ്പെട്ടു. താഴ്ന്ന പ്രദേശങ്ങൾ വെള്ളത്തിനടിയിലായതോടെ വന്യമൃഗങ്ങൾ ഉൾപ്പെടെ സുരക്ഷിത സ്ഥാനങ്ങൾ തേടി വെള്ളത്തിലൂടെ നീന്തിപ്പോകുന്ന ദൃശ്യങ്ങൾ പുറത്തുവന്നു.
പ്രളയത്തെ പ്രതിരോധിക്കാൻ സ്റ്റേറ്റ് എമർജൻസി സർവീസ് ഉദ്യോഗസ്ഥരും നാട്ടുകാരും ചേർന്ന് രണ്ടായിരത്തോളം മണൽ ചാക്കുകളാണ് ഇതുവരെ തയ്യാറാക്കിയത്. വീടുകളുടെ മുൻവാതിലിലും പിൻവാതിലിലും മണൽ ചാക്കുകൾ നിരത്തി വെള്ളം കയറുന്നത് തടയാനുള്ള തീവ്രശ്രമത്തിലാണ് ഇവർ. ലോംഗ്റീച്ചിലെ പ്രാദേശിക സന്നദ്ധ പ്രവർത്തകർക്ക് സഹായവുമായി സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള കൂടുതൽ ഉദ്യോഗസ്ഥരും സ്ഥലത്തെത്തിയിട്ടുണ്ട്.
ലോംഗ്റീച്ച് മേഖലയിലെ ക്രാംസി എന്ന ചെറിയ ഗ്രാമത്തിൽ ജനങ്ങൾ വലിയ തോതിലുള്ള മുൻകരുതലുകളാണ് സ്വീകരിച്ചിരിക്കുന്നത്. പ്രദേശം വെള്ളത്തിനടിയിലാകാൻ തുടങ്ങിയതോടെ പല കുടുംബങ്ങളും സ്വന്തം വീടിന് ചുറ്റും ഒരു മീറ്ററോളം ഉയരത്തിൽ താൽക്കാലിക ബണ്ടുകൾ നിർമ്മിച്ചു. സ്വന്തം കുതിരകളെയും വളർത്തുമൃഗങ്ങളെയും സംരക്ഷിക്കാൻ വേണ്ടി കൂടിയാണ് ഈ മുൻകരുതൽ. എന്നിരുന്നാലും ജലനിരപ്പ് വേഗത്തിൽ ഉയരുന്നത് വലിയ ആശങ്കയുണ്ടാക്കുന്നതായി പ്രദേശവാസികൾ പറഞ്ഞു.
അതേസമയം, വെള്ളം ഇറങ്ങിത്തുടങ്ങിയ ബുണ്ടാബെർഗ് പോലുള്ള പ്രദേശങ്ങളിൽ ശുചീകരണ പ്രവർത്തനങ്ങൾ ആരംഭിച്ചിട്ടുണ്ട്. ‘മഡ് ആർമി’ എന്നറിയപ്പെടുന്ന സന്നദ്ധ പ്രവർത്തകരുടെ സംഘം വീടുകളിൽ നിന്നും തെരുവുകളിൽ നിന്നും ചെളിയും അവശിഷ്ടങ്ങളും നീക്കം ചെയ്യുന്ന പ്രവർത്തനങ്ങളിൽ സജീവമാണ്.
