ഹൈദരാബാദ്: മുതിർന്ന രാഷ്ട്രീയ നേതാവും മുൻ കേന്ദ്രമന്ത്രിയുമായ കാവൂരി സാംബശിവറാവു അന്തരിച്ചു. 82 വയസ്സായിരുന്നു. ഹൈദരാബാദിലെ വസതിയിലായിരുന്നു അന്ത്യം. വാർധക്യസഹജമായ അസുഖങ്ങളെത്തുടർന്ന് ചികിത്സയിലായിരുന്നു അദ്ദേഹം.
ആന്ധ്രാപ്രദേശിലെ മച്ചിലിപ്പട്ടണം, ഏലൂരു മണ്ഡലങ്ങളിൽ നിന്നായി അഞ്ചുതവണ അദ്ദേഹം ലോക്സഭയിലേക്ക് തിരഞ്ഞെടുക്കപ്പെട്ടിട്ടുണ്ട്. യു.പി.എ സർക്കാരിന്റെ കാലത്ത് കേന്ദ്ര ടെക്സ്റ്റൈൽസ് മന്ത്രിയായി അദ്ദേഹം സേവനമനുഷ്ഠിച്ചിട്ടുണ്ട്. ദീർഘകാലം കോൺഗ്രസ് പാർട്ടിയിൽ പ്രവർത്തിച്ചിരുന്ന അദ്ദേഹം പിന്നീട് ബി.ജെ.പിയിൽ ചേർന്നു.
ആന്ധ്രാപ്രദേശിലെ രാഷ്ട്രീയ, സാമൂഹിക മേഖലകളിൽ വലിയ സ്വാധീനമുണ്ടായിരുന്ന നേതാവായിരുന്നു സാംബശിവറാവു. അദ്ദേഹത്തിന്റെ വിയോഗത്തിൽ പ്രമുഖ രാഷ്ട്രീയ നേതാക്കൾ അനുശോചനം രേഖപ്പെടുത്തി.
