സിഡ്നി: ആഗോളതലത്തിലെ യുദ്ധസാഹചര്യങ്ങളെത്തുടർന്നുണ്ടായ ഇന്ധനപ്രതിസന്ധി ഓസ്ട്രേലിയയിലെ പ്രാദേശിക ടൂറിസം മേഖലയെ സാരമായി ബാധിക്കുന്നു. ഈസ്റ്റർ അവധിക്കാലം അടുത്തെത്തിയിരിക്കെ, അവസാന നിമിഷം നടത്താറുള്ള ബുക്കിംഗുകളിൽ വലിയ ഇടിവ് രേഖപ്പെടുത്തിയതായി വിവിധ വിനോദസഞ്ചാര കേന്ദ്രങ്ങൾ റിപ്പോർട്ട് ചെയ്യുന്നു.
ന്യൂ സൗത്ത് വെയ്ൽസിലെ (NSW) ടൂറിസ്റ്റ് പാർക്ക് ഉടമകളുടെ അഭിപ്രായത്തിൽ, ഇന്ധനവില വർദ്ധനവിനേക്കാൾ ഉപഭോക്താക്കളെ ഭയപ്പെടുത്തുന്നത് യാത്രാമധ്യേ ഇന്ധനം തീർന്നുപോയാൽ വഴിയിൽ കുടുങ്ങിപ്പോകുമോ എന്ന ആശങ്കയാണ്. സാധാരണയായി ഈസ്റ്ററിന് രണ്ടാഴ്ച മുൻപ് ലഭിക്കാറുള്ള ടൂറിസ്റ്റ് അന്വേഷണങ്ങൾ ഇത്തവണ പകുതിയിൽ താഴെയായി കുറഞ്ഞുവെന്ന് എൻ.എസ്.ഡബ്ല്യു-വിലെ ഒരു ഹോളിഡേ പാർക്ക് മാനേജർ ഫ്രാങ്ക് പറഞ്ഞു. “ബുക്കിംഗുകൾ സാധാരണ ലഭിക്കാറുള്ളതാണ്, എന്നാൽ ഇന്ധനപ്രതിസന്ധി ആ താൽപ്പര്യത്തെ പാടെ ഇല്ലാതാക്കി. നാട്ടിലേക്ക് സുരക്ഷിതമായി തിരിച്ചെത്താൻ കഴിയുമോ എന്ന് ആളുകൾക്ക് ഉറപ്പില്ല,” അദ്ദേഹം കൂട്ടിച്ചേർത്തു.
അതേസമയം, കോഫ്സ് ഹാർബർ (Coffs Harbour) പോലുള്ള പ്രമുഖ വിനോദസഞ്ചാര കേന്ദ്രങ്ങളിൽ ചിലയിടങ്ങളിൽ ഇപ്പോഴും വലിയ തിരക്ക് അനുഭവപ്പെടുന്നുണ്ട്. വർഷങ്ങൾക്ക് മുൻപേ ബുക്ക് ചെയ്തവരാണ് ഇവരിൽ ഭൂരിഭാഗവും. എന്നാൽ അവസാന നിമിഷം യാത്ര പ്ലാൻ ചെയ്യുന്നവരിൽ വലിയൊരു വിഭാഗം തങ്ങളുടെ തീരുമാനത്തിൽ നിന്ന് പിന്മാറുന്നതായി മോട്ടലുകളും കാരവൻ പാർക്കുകളും സാക്ഷ്യപ്പെടുത്തുന്നു. പ്രതിസന്ധി മറികടക്കാൻ ചില ടൂറിസ്റ്റ് കേന്ദ്രങ്ങൾ താമസക്കാർക്ക് സൗജന്യ ‘ഫ്യുവൽ വൗച്ചറുകൾ’ നൽകാനും ബുക്കിംഗ് നിയമങ്ങളിൽ ഇളവുകൾ വരുത്താനും തുടങ്ങിയിട്ടുണ്ട്.
ഓസ്ട്രേലിയൻ ടൂറിസം ഇൻഡസ്ട്രി കൗൺസിലിന്റെ കണക്കനുസരിച്ച് പ്രാദേശിക ടൂറിസം മേഖല ഏകദേശം 1,540 കോടി ഡോളറിന്റെ വരുമാനവും 53,000-ത്തിലധികം തൊഴിലവസരങ്ങളുമാണ് രാജ്യത്ത് സൃഷ്ടിക്കുന്നത്. ഈസ്റ്റർ അവധിക്കാലത്തെ മാന്ദ്യം ഈ മേഖലയെ തളർത്തുമെന്ന ആശങ്ക ശക്തമാണ്. ഇന്ധന എക്സൈസ് ഡ്യൂട്ടി കുറച്ച സർക്കാർ നടപടി സ്വാഗതാർഹമാണെന്നും, പ്രത്യാഘാതങ്ങൾക്കിടയിലും പ്രാദേശിക ടൂറിസം കേന്ദ്രങ്ങളെ പിന്തുണയ്ക്കാൻ ഓസ്ട്രേലിയക്കാർ മുന്നോട്ടുവരണമെന്നും കൗൺസിൽ സി.ഇ.ഒ എറിൻ മക്ലിയോഡ് അഭ്യർത്ഥിച്ചു. ഓരോ പ്രാദേശിക യാത്രയും അവിടുത്തെ ചെറുകിട ബിസിനസ്സുകളെയും ജീവനക്കാരെയും സഹായിക്കുമെന്നും അദ്ദേഹം ഓർമ്മിപ്പിച്ചു.
