മെല്ബണ്: ഓസ്ട്രേലിയയിലെ ഏറ്റവും വലിയ സമ്പന്നയായ ജിന റൈന്ഹാര്ട്ട് (Gina Rinehart),രാജ്യത്തെ രാഷ്ട്രീയ ഫണ്ടിംഗ് സമവാക്യങ്ങള് മാറ്റിമറിക്കുന്ന പുതിയ നീക്കവുമായി രംഗത്ത്.മുന്പ് ലിബറല് പാര്ട്ടിക്ക് വലിയ തുകകള് സംഭാവന നല്കിയിരുന്ന മൂന്ന് പ്രമുഖ ഫണ്ട് മാനേജര്മാരെ തന്റെ പക്ഷത്തേക്ക് അടുപ്പിച്ചിരിക്കുകയാണ് റൈന്ഹാര്ട്ട്.
അമേരിക്കന് മുന് പ്രസിഡന്റ് ഡൊണാള്ഡ് ട്രംപുമായുള്ള തന്റെ വ്യക്തിപരമായ അടുപ്പമാണ് ഇതിനായി റൈന്ഹാര്ട്ട് ആയുധമാക്കിയത്.ഫ്ലോറിഡയിലെ ട്രംപിന്റെ ആഡംബര വസതിയായ മാര്-എ-ലാഗോയില് വെച്ച് ട്രംപിനൊപ്പം അത്താഴവിരുന്നില് പങ്കെടുക്കാന് ഈ മൂന്ന് ഫണ്ട് മാനേജര്മാര്ക്കും റൈന്ഹാര്ട്ട് അവസരമൊരുക്കും.
എന്നാല് ഈ വിരുന്നില് പങ്കെടുക്കുന്നതിനുള്ള പകരമായി ഒരു പ്രധാന നിബന്ധനയാണ് റൈന്ഹാര്ട്ട് മുന്നോട്ടുവെച്ചിരിക്കുന്നത്.ഓരോ ഫണ്ട് മാനേജറും 1,00,000 ഡോളര് വീതം പോളിന് ഹാന്സന്റെ ‘വണ് നേഷന്’ പാര്ട്ടിക്ക് സംഭാവനയായി നല്കണം.മുന്പ് ലിബറല് പാര്ട്ടിയുടെ പ്രധാന സാമ്പത്തിക സ്രോതസ്സുകളായിരുന്നവരാണ് ഈ തുക ഇപ്പോള് വണ് നേഷനിലേക്ക് മാറ്റുന്നത് എന്നത് രാഷ്ട്രീയ വൃത്തങ്ങളില് വലിയ ചര്ച്ചയായിട്ടുണ്ട്.
ലിബറല് പാര്ട്ടിക്ക് ലഭിക്കേണ്ടിയിരുന്ന വലിയൊരു സാമ്പത്തിക പിന്തുണ തീവ്ര വലതുപക്ഷ പാര്ട്ടിയായ വണ് നേഷനിലേക്ക് വഴിതിരിച്ചുവിടുന്നത് വരാനിരിക്കുന്ന തിരഞ്ഞെടുപ്പുകളില് നിര്ണ്ണായകമായേക്കാം.ജിന റൈന്ഹാര്ട്ടിന് ഡൊണാള്ഡ് ട്രംപുമായുള്ള സ്വാധീനം ഓസ്ട്രേലിയന് രാഷ്ട്രീയത്തിലെ ശക്തികേന്ദ്രങ്ങളെ സ്വാധീനിക്കാന് അവര് എങ്ങനെ ഉപയോഗിക്കുന്നു എന്നതിന്റെ തെളിവുകൂടിയാണ് ഈ നീക്കം.
