സിഡ്നിയിലെ ബോണ്ടായി ബീച്ചിലുണ്ടായ ഭീകരാക്രമണത്തിന്റെ പശ്ചാത്തലത്തില്,ഓസ്ട്രേലിയന് സര്ക്കാര് രാജ്യത്തെ തോക്ക് നിയമങ്ങള് കൂടുതല് കര്ശനമാക്കാനുള്ള നടപടി ആരംഭിച്ചു .ആക്രമണത്തെ തുടര്ന്ന് പ്രധാനമന്ത്രി ആന്റണി ആല്ബനീസ് വിളിച്ചുചേര്ത്ത അടിയന്തര ദേശീയ മന്ത്രിസഭാ യോഗത്തില് രാജ്യത്തെ തോക്ക് നിയമങ്ങള് കൂടുതല് കര്ശനമാക്കാനുള്ള നിര്ദ്ദേശങ്ങള് ചര്ച്ച ചെയ്തു.
തോക്കുകളുടെ എണ്ണം പരിമിതപ്പെടുത്തും. ഒരു വ്യക്തിക്ക് കൈവശം വെക്കാന് കഴിയുന്ന തോക്കുകളുടെ എണ്ണത്തില് ദേശീയ തലത്തില് കര്ശനമായ പരിധി കൊണ്ടുവരും. നിലവില് ഇത് സംസ്ഥാനങ്ങള്ക്കനുസരിച്ച് വ്യത്യാസപ്പെട്ടിരുന്നു. ലൈസന്സിനായി അപേക്ഷിക്കുന്നവര്ക്ക് തോക്ക് സ്വന്തമാക്കാനുള്ള ‘നിയമപരമായ ആവശ്യകത’ കൂടുതല് കര്ശനമായി തെളിയിക്കേണ്ടിവരും.
ലൈസന്സിംഗ് പരിഷ്കരിക്കും.തോക്ക് ലൈസന്സിംഗ് വ്യവസ്ഥകള് രാജ്യവ്യാപകമായി ഏകീകരിക്കാനും,ലൈസന്സ് നല്കുന്ന പ്രക്രിയ കൂടുതല് സങ്കീര്ണ്ണമാക്കാനും സാധ്യതയുണ്ട്.നിയമപരമായ അപേക്ഷകളില്ലാത്തതോ, പുതിയ നിയമങ്ങള് അനുസരിച്ച് അധികമുള്ളതോ ആയ തോക്കുകള് സര്ക്കാരിലേക്ക് തിരിച്ചേല്പ്പിക്കാന് അവസരം നല്കുന്ന സ്വമേധയാ ഉള്ള തോക്ക് തിരിച്ചെടുക്കല് പദ്ധതി പ്രഖ്യാപിക്കും.നേരത്തെ പടിഞ്ഞാറന് ഓസ്ട്രേലിയയില് ഇത് നടപ്പിലാക്കിയിരുന്നു
1996-ല് പോര്ട്ട് ആര്തര് കൂട്ടക്കൊലയ്ക്ക് ശേഷം ഓസ്ട്രേലിയയില് തോക്ക് നിയമങ്ങള് വലിയതോതില് കര്ശനമാക്കിയിരുന്നു. അന്ന്, ഓട്ടോമാറ്റിക്, സെമി-ഓട്ടോമാറ്റിക് റൈഫിളുകള് പൂര്ണ്ണമായും നിരോധിക്കുകയും ഒരു വലിയ തോക്ക് തിരിച്ചെടുക്കല് പദ്ധതി നടപ്പാക്കുകയും ചെയ്തു.
പുതിയ ഭീകരാക്രമണത്തോടെ, 1996-ലെ പരിഷ്കാരങ്ങള്ക്ക് ശേഷം ഇതാദ്യമായാണ് തോക്ക് നിയമങ്ങള് കൂടുതല് കര്ശനമാക്കാന് ദേശീയ തലത്തില് വീണ്ടും ഇത്രയും ശക്തമായ നീക്കം നടത്തുന്നത്.ഇതുമായി ബന്ധപ്പെട്ട ഔദ്യോഗിക നിയമപരമായ പ്രഖ്യാപനങ്ങളും വിശദമായ മാര്ഗ്ഗരേഖകളും വരും ദിവസങ്ങളില് ഓസ്ട്രേലിയന് സര്ക്കാര് പുറത്തുവിടും
