ആർമിഡേൽ: പ്രശസ്ത സിനിമയിലെ ‘ബില്ലി എലിയറ്റിനെ’ അനുസ്മരിപ്പിക്കും വിധം ബാലെ നൃത്തവേദികളിലെ വിസ്മയമാകാൻ ഒരുങ്ങുകയാണ് ഹെൻറി ഗൗ എന്ന പതിനൊന്നുകാരൻ. ന്യൂ സൗത്ത് വെയിൽസിലെ പ്രാദേശിക നഗരമായ ആർമിഡേലിൽ നിന്നുള്ള ഈ കൊച്ചു നർത്തകന്റെ യാത്ര പ്രതിസന്ധികൾ നിറഞ്ഞതായിരുന്നു. നൃത്തത്തോടുള്ള ഹെൻറിയുടെ താൽപ്പര്യം തിരിച്ചറിഞ്ഞ മാതാപിതാക്കൾ, അവന് മികച്ച പരിശീലനം നൽകാനായി ഓരോ വാരാന്ത്യങ്ങളിലും മണിക്കൂറുകളോളം യാത്ര ചെയ്താണ് പ്രൊഫഷണൽ ക്ലാസുകളിൽ എത്തിച്ചിരുന്നത്.
ഒരു വശത്ത് മകന്റെ സ്വപ്നങ്ങൾക്കായി മാതാപിതാക്കൾ കഠിനാധ്വാനം ചെയ്യുമ്പോൾ, മറുവശത്ത് ഹെൻറിയുടെ അമ്മ ആഷ്ലി ഗൗ കാൻസർ ബാധിതയായി ചികിത്സയിലാണ്. രോഗാവസ്ഥയും മറ്റ് ചെറിയ മക്കളുടെ സംരക്ഷണവും വകവെക്കാതെയാണ് മകന്റെ നൃത്തപഠനത്തിനായി ഇവർ മുന്നിട്ടിറങ്ങുന്നത്. പ്രാദേശിക നഗരത്തിൽ ബാലെ പഠനത്തിന് സൗകര്യങ്ങൾ കുറവായതിനാൽ, വിരമിച്ച ഒരു ബാലെ നർത്തകിയിൽ നിന്നും പരിശീലനം നേടാൻ ഇൻവെറെല്ലിലേക്ക് രണ്ട് മണിക്കൂറോളം യാത്ര ചെയ്യേണ്ടി വരുന്നു. കൂടാതെ ബ്രിസ്ബേൻ സിറ്റി യൂത്ത് ബാലെയുടെ പ്രധാന കമ്പനിയിലേക്ക് സ്ഥാനക്കയറ്റം ലഭിച്ചതോടെ ആറ് മണിക്കൂർ നീളുന്ന യാത്രകളും പതിവായി.
നാലാം വയസ്സിൽ സിനിമ കാണാൻ പോയപ്പോൾ സ്ക്രീനിൽ കണ്ട പരസ്യത്തിൽ നിന്നാണ് ഹെൻറിക്ക് നൃത്തത്തോട് താൽപ്പര്യം തോന്നിയത്. ടാപ്പ് ഡാൻസിൽ തുടങ്ങിയെങ്കിലും പിന്നീട് ബാലെയിലേക്ക് മാറുകയും അതിൽ അസാമാന്യ പ്രതിഭ തെളിയിക്കുകയും ചെയ്തു. ഇപ്പോൾ സിഡ്നിയിലെ ഒരു പ്രശസ്ത ബാലെ സ്കൂളിൽ പഠിക്കാനുള്ള അവസരം ഹെൻറിയെ തേടിയെത്തിയിരിക്കുകയാണ്. എന്നാൽ ഇതിനാവശ്യമായ വലിയ സാമ്പത്തിക ചിലവുകൾ കുടുംബത്തിന് വലിയ വെല്ലുവിളിയാണ്. എങ്കിലും ഹെൻറിയുടെ നൃത്ത സ്വപ്നം യാഥാർത്ഥ്യമാക്കാൻ ഏതറ്റം വരെയും പോകുമെന്ന ഉറച്ച തീരുമാനത്തിലാണ് ഈ കുടുംബം.
