തെഹ്റാൻ: പശ്ചിമേഷ്യയിൽ യുദ്ധസാഹചര്യം രൂക്ഷമായതിനെത്തുടർന്ന് ഇറാനിലെ വിവിധ സർവകലാശാലകളിൽ പഠിക്കുന്ന നൂറുകണക്കിന് ഇന്ത്യൻ മെഡിക്കൽ വിദ്യാർത്ഥികൾ ആശങ്കയിൽ. സുരക്ഷാ ഭീഷണിയും യാത്രാ നിയന്ത്രണങ്ങളും കാരണം ഇവർക്ക് നാട്ടിലേക്ക് മടങ്ങാൻ കഴിയാത്ത സാഹചര്യമാണുള്ളത്.
ഇസ്രായേലും ഇറാനും തമ്മിലുള്ള സംഘർഷം വർധിച്ചതോടെ ഇറാനിലെ വിമാനത്താവളങ്ങളുടെ പ്രവർത്തനം തടസ്സപ്പെട്ടിരിക്കുകയാണ്. ഇത് വിദ്യാർത്ഥികളുടെ മടക്കയാത്രയെ പ്രതികൂലമായി ബാധിച്ചു. പല വിമാനങ്ങളും റദ്ദാക്കപ്പെട്ടതിനാൽ വിദ്യാർത്ഥികൾ ഹോസ്റ്റലുകളിലും വാടക വീടുകളിലുമായി കഴിയുകയാണ്.ഇന്ത്യൻ എംബസിയുടെ അടിയന്തര ഇടപെടൽ ഉണ്ടാവണമെന്നാണ് വിദ്യാർത്ഥികളുടെ പ്രധാന ആവശ്യം. തങ്ങളെ സുരക്ഷിതമായി നാട്ടിലെത്തിക്കുന്നതിനായി പ്രത്യേക വിമാനങ്ങൾ ഏർപ്പെടുത്തണമെന്നും ഇവർ ആവശ്യപ്പെടുന്നു.
നിലവിലെ സാഹചര്യത്തിൽ വിദ്യാർത്ഥികളോട് അതീവ ജാഗ്രത പാലിക്കാൻ ഇന്ത്യൻ എംബസി നിർദ്ദേശം നൽകിയിട്ടുണ്ട്. സുരക്ഷിതമായി തുടരാനും അനാവശ്യ യാത്രകൾ ഒഴിവാക്കാനും എംബസി അറിയിച്ചു. വിദ്യാർത്ഥികളുടെ വിവരങ്ങൾ ശേഖരിക്കാനും അവരുമായി നിരന്തരം ബന്ധപ്പെടാനും എംബസി ഉദ്യോഗസ്ഥർ ശ്രമിക്കുന്നുണ്ട്.
