തിരുവനന്തപുരം: തലസ്ഥാന നിവാസികളുടെ ക്രിസ്മസ് പുതുവല്സരാഘോഷങ്ങള്ക്കു കളര് കൂട്ടാന് ക്രിക്കറ്റ് ഉത്സവവും എത്തുന്നു. ഇന്ത്യന് വനിതാ ടീം ലോകകപ്പ് ജേതാക്കളായതിനു ശേഷം ആദ്യം കളിക്കുന്ന പരമ്പരയുടെ മൂന്നു മത്സരങ്ങള്ക്കു വേദിയാകുന്നത് തിരുവനന്തപുരം കാര്യവട്ടം ഗ്രീന്ഫീല്ഡ് സ്റ്റേഡിയം. ഇന്ത്യന് വനിതാ ടീം ശ്രീലങ്കയുടെ വനിതാ ടീമുമായാണ് ഏറ്റുമുട്ടുന്നത്. ഇന്ത്യ-ശ്രീലങ്ക വനിതാ ട്വന്റി20 പരമ്പരയിലെ അവസാന മൂന്നു മത്സരങ്ങളാണ് തിരുവനന്തപുരത്ത് നടക്കുന്നത്. ഡിസംബര് 26, 28, 30 തീയതികളിലാണ് മത്സരം. ആദ്യ രണ്ടു മത്സരങ്ങള് വിശാഖപട്ടണത്താണ് നടക്കുന്നത്. അവിടെ നിന്നും ടീം നേരേ തിരുവനന്തപുരത്തേക്കു ക്രിസ്മസിനു തലേന്നു വന്നിറങ്ങുകയാകും ചെയ്യുന്നത്.
വനിതാ ലോകകപ്പ് പോരാട്ടത്തില് അഞ്ചു മത്സരങ്ങള്ക്ക് വേദിയായി തിരുവനന്തപുരത്തെ നിര്ദേശിച്ചിരുന്നതാണ്. എന്നാല് ലോകകപ്പ് മത്സരം നടക്കുന്ന മറ്റു സ്ഥലങ്ങളില് നിന്ന് തിരുവനന്തപുരത്തേക്ക് നേരിട്ടു വിമാനസര്വീസ് ഇല്ലാതിരുന്നതു മൂലമാണ് അന്നത്തെ സാധ്യത ഇല്ലാതായത്. അതിന്റെ കൂടി പോരായ്മ പരിഹരിക്കുന്ന രീതിയിലാണ് ഇപ്പോള് വിജയികളുടെ ആദ്യ പരമ്പരയുടെ ഏറ്റവും വാശിയേറിയ മൂന്നു മത്സരങ്ങള് ഇവിടെ നടക്കുന്നത്.
അടുത്ത വര്ഷം ഇന്ത്യന് പുരുഷ ടീമിന്റെ ട്വന്റി20 മത്സരത്തിനും കാര്യവട്ടം ഗ്രീന്ഫീല്ഡ് സ്റ്റേഡിയം വേദിയാകുന്നുണ്ട്. ജനുവരി 30ന് ന്യൂസീലാന്ഡിന് എതിരേയാണ് ആ മത്സരം
