മെൽബൺ: ഓസ്ട്രേലിയയിൽ സ്വകാര്യ ആരോഗ്യ ഇൻഷുറൻസ് പ്രീമിയങ്ങൾ ഈ ആഴ്ച മുതൽ കുത്തനെ വർധിക്കുന്ന പശ്ചാത്തലത്തിൽ, രാജ്യത്തെ നാലിലൊന്ന് ഉപഭോക്താക്കളും തങ്ങളുടെ ഇൻഷുറൻസ് പരിരക്ഷ കുറയ്ക്കാനോ പോളിസികൾ പൂർണ്ണമായും റദ്ദാക്കാനോ ആലോചിക്കുന്നതായി റിപ്പോർട്ട്. ഫെഡറൽ ഗവൺമെന്റ് അംഗീകരിച്ച ശരാശരി 4.41 ശതമാനം വർധനവ് നിലവിൽ വരുന്നതോടെയാണിത്. 2017-ന് ശേഷമുള്ള ഏറ്റവും വലിയ വില വർധനവാണിതെന്ന് ചൂണ്ടിക്കാണിക്കപ്പെടുന്നു.
പുതിയ പരിഷ്കാരം നടപ്പിലാകുന്നതോടെ ഓരോ ഉപഭോക്താവിനും അവരുടെ പോളിസിയുടെ സ്വഭാവമനുസരിച്ച് പ്രതിവർഷം 80 ഡോളർ മുതൽ 160 ഡോളർ വരെ അധിക ബാധ്യതയുണ്ടാകും. ചില ഇൻഷുറൻസ് കമ്പനികൾ 5.47 ശതമാനം വരെ വർധനവ് നടപ്പാക്കാൻ പദ്ധതിയിടുന്നുണ്ട്. ജീവിതച്ചെലവ് ക്രമാതീതമായി വർധിച്ച സാഹചര്യത്തിൽ, ഇത്രയും വലിയൊരു തുക അധികമായി നൽകാൻ സാധിക്കില്ലെന്ന നിലപാടിലാണ് ഭൂരിഭാഗം ഓസ്ട്രേലിയക്കാരും.
ഡിജിറ്റൽ ബ്രോക്കറായ ‘കോൺക്രോഡ്’ (Konkrd) നടത്തിയ സർവേ പ്രകാരം, 23 ശതമാനം ആളുകളും തങ്ങളുടെ ഇൻഷുറൻസ് കവറേജ് കുറയ്ക്കാനോ പോളിസി വേണ്ടെന്ന് വെക്കാനോ തീരുമാനിച്ചിട്ടുണ്ട്. ഇത് സാമ്പത്തികമായി പിന്നാക്കം നിൽക്കുന്നവരെയും ആരോഗ്യപ്രശ്നങ്ങളുള്ളവരെയും കൂടുതൽ പ്രതിസന്ധിയിലാക്കും. കുറഞ്ഞ പ്രീമിയമുള്ള പോളിസികളിലേക്ക് മാറുന്നത് പലപ്പോഴും അടിയന്തര ഘട്ടങ്ങളിൽ ആവശ്യമായ ചികിത്സാ പരിരക്ഷ ലഭിക്കാത്ത സാഹചര്യം സൃഷ്ടിച്ചേക്കാം.
പോളിസികളിലെ വ്യത്യാസങ്ങൾ മനസ്സിലാക്കാൻ പ്രയാസമാണെന്ന് 35 ശതമാനം പേർ സമ്മതിക്കുമ്പോൾ, 75 ശതമാനത്തോളം ആളുകൾ തങ്ങളുടെ ഇൻഷുറൻസ് രേഖകൾ പൂർണ്ണമായി വായിച്ചു നോക്കാറില്ലെന്നും സർവേ വ്യക്തമാക്കുന്നു. വ്യക്തമായ ധാരണയില്ലാതെ എടുക്കുന്ന തീരുമാനങ്ങൾ ഭാവിയിൽ വലിയ സാമ്പത്തിക റിസ്ക് ഉണ്ടാക്കുമെന്ന് കോൺക്രോഡ് സഹസ്ഥാപകൻ സ്കോട്ട് വിൽസൺ മുന്നറിയിപ്പ് നൽകി. ഇൻഷുറൻസ് പൂർണ്ണമായും ഉപേക്ഷിക്കുന്നതിന് പകരം, വ്യത്യസ്ത കമ്പനികളുടെ പ്ലാനുകൾ താരതമ്യം ചെയ്ത് അനുയോജ്യമായത് തിരഞ്ഞെടുക്കാനാണ് വിദഗ്ധർ നിർദ്ദേശിക്കുന്നത്.
