ടെഹ്റാൻ: തങ്ങളുടെ ഭൂപ്രദേശം ഇറാനെതിരായ സൈനിക നീക്കങ്ങൾക്കായി അമേരിക്കയ്ക്ക് വിട്ടുനൽകരുതെന്ന് പശ്ചിമേഷ്യൻ രാജ്യങ്ങൾക്ക് ഇറാന്റെ കർശന മുന്നറിയിപ്പ്. മേഖലയിലെ നിലവിലെ പ്രതിസന്ധികൾക്ക് പ്രധാന കാരണം ഇത്തരം വിദേശ സൈനിക താവളങ്ങളാണെന്നും ഇവ ഇറാനെതിരായ ആക്രമണങ്ങൾക്കായി ഉപയോഗിക്കുന്നുണ്ടെന്നും ടെഹ്റാൻ ആരോപിച്ചു. അമേരിക്കൻ താവളങ്ങൾക്ക് അനുമതി നൽകുന്നത് അധിനിവേശത്തിന് കൂട്ടുനിൽക്കുന്നതിന് തുല്യമായി കാണുമെന്നും ഇറാൻ വ്യക്തമാക്കി.
ഇറാൻ വിദേശകാര്യ മന്ത്രാലയം സോഷ്യൽ മീഡിയയിലൂടെയാണ് അയൽരാജ്യങ്ങൾക്ക് ഈ ജാഗ്രതാ നിർദ്ദേശം നൽകിയത്. അമേരിക്കയും ഇസ്രായേലും നടത്തുന്ന സൈനിക നീക്കങ്ങൾക്ക് തങ്ങളുടെ സൗകര്യങ്ങൾ ഉപയോഗിക്കുന്നത് തടയാൻ പ്രാദേശിക രാജ്യങ്ങൾ അടിയന്തരമായി ഇടപെടണമെന്ന് ഇറാൻ ആവശ്യപ്പെട്ടു. വിദേശകാര്യ മന്ത്രാലയ വക്താവ് ഇസ്മായിൽ ബഗായ് ആണ് ഇക്കാര്യം അറിയിച്ചത്. അന്താരാഷ്ട്ര നിയമമനുസരിച്ച് സ്വയം പ്രതിരോധിക്കാനുള്ള അവകാശം തങ്ങൾക്കുണ്ടെന്നും, അയൽരാജ്യങ്ങളിലെ താവളങ്ങൾ ഉപയോഗിച്ച് ഇറാനെ ആക്രമിച്ചാൽ അതിന്റെ പ്രത്യാഘാതം ആ രാജ്യങ്ങളും നേരിടേണ്ടി വരുമെന്നും അദ്ദേഹം മുന്നറിയിപ്പ് നൽകി.
യുദ്ധം മൂന്നാം വാരത്തിലേക്ക്; ഖത്തറിന് വൻ സാമ്പത്തിക നഷ്ടം ഫെബ്രുവരി 28-ന് ആരംഭിച്ച ഇറാൻ-ഇസ്രായേൽ യുദ്ധം മൂന്നാം വാരത്തിലേക്ക് കടക്കുമ്പോൾ മേഖലയിലെ ഊർജ്ജ മേഖല കടുത്ത പ്രതിസന്ധിയിലാണ്. ഖത്തറിന്റെ പ്രകൃതിവാതക കേന്ദ്രങ്ങൾക്ക് നേരെയുണ്ടായ ഇറാൻ ആക്രമണത്തിൽ ഏകദേശം 20 ബില്യൺ ഡോളറിന്റെ വാർഷിക വരുമാന നഷ്ടമാണ് കണക്കാക്കുന്നത്. ഖത്തറിന്റെ എൽ.എൻ.ജി കയറ്റുമതി ശേഷിയുടെ 17 ശതമാനത്തെ ഈ ആക്രമണം ബാധിച്ചു. ഇത് പുനഃസ്ഥാപിക്കാൻ മൂന്ന് മുതൽ അഞ്ച് വർഷം വരെ എടുത്തേക്കാം എന്നാണ് റിപ്പോർട്ടുകൾ.
ഇതിനിടെ, ഇറാന്റെ തെക്കൻ പാഴ്സ് വാതക പാടത്തിന് നേരെയുണ്ടായ ഇസ്രായേൽ ആക്രമണത്തിൽ തങ്ങൾക്ക് പങ്കില്ലെന്ന് അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. ഇത്തരം ഊർജ്ജ കേന്ദ്രങ്ങൾ ആക്രമിക്കരുതെന്ന് താൻ ബെഞ്ചമിൻ നെതന്യാഹുവിനോട് ആവശ്യപ്പെട്ടിരുന്നതായും ട്രംപ് വെളിപ്പെടുത്തി. നിലവിൽ പശ്ചിമേഷ്യയിലെ സംഘർഷം മൂലം ആഗോള വിപണിയിൽ ബ്രെന്റ് ക്രൂഡ് ഓയിൽ വില ബാരലിന് 115 ഡോളർ കടന്നിരിക്കുകയാണ്
