വാഷിംഗ്ടൺ: കാസ്പിയൻ കടൽ മേഖലയിലുള്ള ഇറാന്റെ സുപ്രധാനമായ വ്യോമപ്രതിരോധ സംവിധാനങ്ങൾക്ക് നേരെ ഇസ്രയേൽ സൈന്യം ശക്തമായ ആക്രമണം നടത്തി. ഇറാന്റെ തന്ത്രപ്രധാനമായ സൈനിക കേന്ദ്രങ്ങളെ ലക്ഷ്യമിട്ടാണ് ഈ നീക്കമെന്ന് ഇസ്രയേൽ വ്യക്തമാക്കി.ഇറാന്റെ വടക്കൻ മേഖലയിലെ പ്രധാന സുരക്ഷാ കവചമായിരുന്ന പ്രതിരോധ സംവിധാനങ്ങളാണ് ആക്രമണത്തിൽ തകർന്നത്. കാസ്പിയൻ കടൽ വഴിയുള്ള ഇറാന്റെ സൈനിക നീക്കങ്ങളെ തടയാൻ ഈ ആക്രമണം വഴി സാധിക്കുമെന്നാണ് പ്രതിരോധ വിദഗ്ധരുടെ വിലയിരുത്തൽ. ഇറാന്റെ ഭാഗത്തുനിന്ന് കടുത്ത പ്രത്യാക്രമണം ഉണ്ടാകാൻ സാധ്യതയുള്ളതിനാൽ ഇസ്രയേലിലും മേഖലയിലെ അമേരിക്കൻ സൈനിക താവളങ്ങളിലും അതീവ ജാഗ്രതാ നിർദ്ദേശം നൽകിയിട്ടുണ്ട്.പശ്ചിമേഷ്യയിലെ യുദ്ധസാഹചര്യം ഓരോ മണിക്കൂറിലും കൂടുതൽ സങ്കീർണ്ണമായിക്കൊണ്ടിരിക്കുകയാണ്. ഇതിനിടെ, ഇറാനെതിരെ വീണ്ടും കടുത്ത മുന്നറിയിപ്പുമായി അമേരിക്കൻ പ്രസിഡന്റ് ഡൊണാൾഡ് ട്രംപ് രംഗത്തെത്തി. ഇറാന്റെ എണ്ണ ശേഖരവും മറ്റ് തന്ത്രപ്രധാന കേന്ദ്രങ്ങളും ലക്ഷ്യമിടുമെന്ന ട്രംപിന്റെ മുൻ പ്രസ്താവനകൾക്ക് പിന്നാലെയാണ് പുതിയ നീക്കങ്ങൾ. സംഭവത്തിൽ ഇറാൻ ഇതുവരെ ഔദ്യോഗികമായി പ്രതികരിച്ചിട്ടില്ലെങ്കിലും മേഖലയിൽ വലിയ തോതിലുള്ള സൈനിക വിന്യാസം നടക്കുന്നതായാണ് റിപ്പോർട്ടുകൾ.
കാസ്പിയൻ കടലിലെ ഇറാന്റെ വ്യോമപ്രതിരോധ സംവിധാനങ്ങൾ തകർത്ത് ഇസ്രയേൽ; മുന്നറിയിപ്പുമായി വീണ്ടും ട്രംപ്
