അഹമ്മദാബാദ്: ഇന്ത്യൻ ആഭ്യന്തര ക്രിക്കറ്റിലെ കരുത്തരായ മുംബൈയെ പരാജയപ്പെടുത്തി ജമ്മു കശ്മീർ ആദ്യമായി രഞ്ജി ട്രോഫി കിരീടം ചൂടി. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടന്ന ആവേശകരമായ ഫൈനലിൽ 72 റൺസിനാണ് ജമ്മു കശ്മീർ വിജയം വരിച്ചത്.രഞ്ജി ട്രോഫിയുടെ ചരിത്രത്തിൽ ആദ്യമായാണ് ജമ്മു കശ്മീർ ഫൈനലിൽ എത്തുന്നതും കിരീടം നേടുന്നതും.
42 തവണ ചാമ്പ്യന്മാരായ മുംബൈയെ അട്ടിമറിച്ചാണ് ഈ നേട്ടം.രണ്ടാം ഇന്നിങ്സിൽ വിജയലക്ഷ്യമായ 244 റൺസ് പിന്തുടർന്ന മുംബൈ 171 റൺസിന് പുറത്തായി. ജമ്മു കശ്മീരിന്റെ സ്പിൻ കരുത്തിന് മുന്നിൽ മുംബൈ ബാറ്റിംഗ് നിര തകരുകയായിരുന്നു.രണ്ടാമിന്നിങ്സിൽ അഞ്ച് വിക്കറ്റ് വീഴ്ത്തിയ ഓഫ് സ്പിന്നർ വസീം ബഷീറാണ് മുംബൈയെ തകർത്തത്. ആദ്യ ഇന്നിങ്സിലും താരം മികച്ച പ്രകടനം കാഴ്ചവെച്ചിരുന്നു.ആദ്യ ഇന്നിങ്സിൽ അബ്ദുൾ സമദും രണ്ടാം ഇന്നിങ്സിൽ ശുഭം ഖജൂരിയയും നടത്തിയ ബാറ്റിംഗ് പ്രകടനമാണ് ജമ്മു കശ്മീരിന് മാന്യമായ സ്കോർ സമ്മാനിച്ചത്.
വിജയത്തിന് പിന്നാലെ കശ്മീർ താഴ്വരയിലാകെ വലിയ ആഘോഷങ്ങളാണ് നടക്കുന്നത്. കഠിനാധ്വാനത്തിന്റെ ഫലമാണ് ഈ വിജയമെന്ന് ടീം ക്യാപ്റ്റൻ ശുഭം പാണ്ഡെ പ്രതികരിച്ചു.ക്രിക്കറ്റ് ലോകത്തെ ഒന്നടങ്കം ഞെട്ടിച്ച ഈ വിജയം ജമ്മു കശ്മീർ ക്രിക്കറ്റിന്റെ ചരിത്രത്തിലെ സുവർണ്ണ അധ്യായമായി മാറി. ടീമിന് വിവിധ കോണുകളിൽ നിന്ന് അഭിനന്ദനപ്രവാഹമാണ്.
