വാഷിംഗ്ടൺ: സൂപ്പർ ബൗൾ LX-ന്റെ ഔദ്യോഗിക ഹാഫ് ടൈം ഷോയ്ക്ക് ബദലായി ടേണിംഗ് പോയിന്റ് യുഎസ്എ സംഘടിപ്പിച്ച പരിപാടിക്ക് വൻ സ്വീകാര്യത. പ്രശസ്ത റോക്ക് താരം കിഡ് റോക്ക് (Kid Rock) നയിച്ച ഈ ബദൽ ഷോ 50 ലക്ഷത്തിലധികം (5 Million) ആളുകളാണ് തത്സമയം കണ്ടത്. സ്പാനിഷ് ഭാഷയിൽ ബാഡ് ബണ്ണി നടത്തിയ ഔദ്യോഗിക പ്രകടനത്തിനെതിരെ ഉയർന്ന പ്രതിഷേധങ്ങൾക്കിടയിലാണ് കിഡ് റോക്കിന്റെ ഷോ ശ്രദ്ധേയമായത്.
അമേരിക്കൻ മൂല്യങ്ങളും ദേശീയതയും ഉയർത്തിപ്പിടിക്കുന്ന ഒരു ‘ദേശഭക്തി സംഗീത പരിപാടി’ (Patriotic Counter-Program) എന്ന നിലയിലാണ് കിഡ് റോക്കിന്റെ ഷോ അവതരിപ്പിക്കപ്പെട്ടത്. ബാഡ് ബണ്ണിയുടെ സ്പാനിഷ് ഷോയിൽ നിരാശരായ അമേരിക്കൻ പ്രേക്ഷകർ കൂട്ടത്തോടെ ഈ ബദൽ പരിപാടിയിലേക്ക് തിരിഞ്ഞതാണ് കാണികളുടെ എണ്ണത്തിൽ ഇത്രയും വലിയ വർദ്ധനവുണ്ടാകാൻ കാരണം.
കിഡ് റോക്കിന്റെ ഹിറ്റ് ഗാനങ്ങൾക്കൊപ്പം അമേരിക്കൻ ദേശീയതയെ പുകഴ്ത്തുന്ന പ്രകടനങ്ങളും ചടങ്ങിന് മാറ്റുകൂട്ടി.”യഥാർത്ഥ അമേരിക്കൻ സംഗീതം” എന്ന മുദ്രാവാക്യവുമായാണ് ടേണിംഗ് പോയിന്റ് യുഎസ്എ ഈ ഷോ സംപ്രേക്ഷണം ചെയ്തത്.ഔദ്യോഗിക ഷോയെ അപേക്ഷിച്ച് ഈ പരിപാടി കൂടുതൽ ഊർജ്ജസ്വലവും അമേരിക്കൻ സംസ്കാരത്തോട് ചേർന്നുനിൽക്കുന്നതുമാണെന്ന് സോഷ്യൽ മീഡിയയിൽ പലരും അഭിപ്രായപ്പെട്ടു.
സൂപ്പർ ബൗൾ ചരിത്രത്തിൽ ഇതാദ്യമായാണ് ഒരു ബദൽ ഹാഫ് ടൈം ഷോയ്ക്ക് ഇത്രയേറെ സ്വീകാര്യത ലഭിക്കുന്നത്. ബാഡ് ബണ്ണിയുടെ പ്രകടനത്തെ പ്രസിഡന്റ് ഡൊണാൾഡ് ട്രംപ് രൂക്ഷമായി വിമർശിച്ചതിന് പിന്നാലെ കിഡ് റോക്കിന്റെ ഷോയ്ക്ക് ലഭിച്ച ഈ ജനപ്രീതി വലിയ രാഷ്ട്രീയ ചർച്ചകൾക്കും വഴിവെച്ചിട്ടുണ്ട്.
