കേന്ദ്ര സര്ക്കാരിന്റെ അവഗണനയ്ക്കെതിരെ ഇടതുപക്ഷ ജനാധിപത്യ മുന്നണി തിരുവനന്തപുരത്ത് നടത്തിയ പ്രതിഷേധ സമരം കേരള രാഷ്ട്രീയത്തില് വലിയ ചര്ച്ചയായിരിക്കുകയാണ്.കേരളത്തോടുള്ള കേന്ദ്ര സര്ക്കാരിന്റെ സാമ്പത്തിക വിവേചനമാണ് സമരത്തിന് ആധാരമായി എല്ഡിഎഫ് ഉയര്ത്തിക്കാട്ടുന്നത്.കേരളത്തെ ശ്വാസം മുട്ടിക്കുന്ന കേന്ദ്ര നയങ്ങള് എന്ന മുദ്രാവാക്യമുയര്ത്തിയാണ് സെക്രട്ടേറിയറ്റിന് മുന്നില് ജനകീയ പ്രതിരോധം സംഘടിപ്പിച്ചത്.കേരളത്തിന്റെ കടമെടുപ്പ് പരിധി കേന്ദ്ര സര്ക്കാര് വെട്ടിക്കുറയ്ക്കുന്നത് വഴി സംസ്ഥാനത്തെ വികസന പ്രവര്ത്തനങ്ങളും ക്ഷേമ പെന്ഷന് വിതരണവും തടസ്സപ്പെടുന്നുവെന്ന് എല്ഡിഎഫ് ആരോപിച്ചു.
ജിഎസ്ടി നഷ്ടപരിഹാര കുടിശ്ശികയും കേന്ദ്ര വിഹിതവും നല്കുന്നതില് വരുത്തുന്ന കാലതാമസം വലിയ സാമ്പത്തിക പ്രതിസന്ധിക്ക് കാരണമാകുന്നു.സില്വര് ലൈന് പദ്ധതിക്കും പുതിയ ട്രെയിന് സര്വീസുകള്ക്കും കേന്ദ്രം അനുമതി നല്കുന്നില്ല.
കേരളത്തെ ഒരു തരത്തിലും മുന്നോട്ട് പോകാന് അനുവദിക്കില്ലെന്ന വാശിയിലാണ് കേന്ദ്രം. സംസ്ഥാനങ്ങളുടെ അവകാശങ്ങളെ തകര്ത്ത് ഫെഡറല് സംവിധാനത്തെ കേന്ദ്രം അട്ടിമറിക്കുന്നു. ജനകീയ വികാരം ഡല്ഹിയില് വരെ എത്തുന്ന രീതിയില് ഈ സമരം തുടരും എന്ന് സമരം ഉദ്ഘാടനം ചെയ്തുകൊണ്ട് മുഖ്യമന്ത്രി പിണറായി വിജയന് പറഞ്ഞു
അതേ സമയം എല്ഡിഎഫിന്റെ സാമ്പത്തിക പരാജയം മറച്ചുവെക്കാനാണ് കേന്ദ്രത്തിന് മേല് കുറ്റം ചുമത്തുന്നതെന്ന് പ്രതിപക്ഷ നേതാവ് വി.ഡി. സതീശന് ആരോപിച്ചു. സംസ്ഥാന സര്ക്കാരിന്റെ ധൂര്ത്താണ് യഥാര്ത്ഥ പ്രതിസന്ധിയെന്നും അദ്ദേഹം പറഞ്ഞു.കേന്ദ്രം നല്കുന്ന ഫണ്ടുകള് കേരളം വകമാറ്റി ചിലവഴിക്കുകയാണെന്നും, സമരം രാഷ്ട്രീയ നാടകമാണെന്നും ബിജെപി സംസ്ഥാന അധ്യക്ഷന് കെ. സുരേന്ദ്രനും പ്രതികരിച്ചു.
തിരുവനന്തപുരത്ത് നടന്ന ഈ സമരം വരും ദിവസങ്ങളില് ജില്ലാ കേന്ദ്രങ്ങളിലേക്കും വ്യാപിപ്പിക്കാനാണ് എല്ഡിഎഫ് തീരുമാനം. ഫെബ്രുവരിയില് ഡല്ഹിയില് കൂടുതല് വലിയ രീതിയിലുള്ള പ്രതിഷേധങ്ങള് സംഘടിപ്പിക്കാനും ഇടത് മുന്നണി ആലോചിക്കുന്നുണ്ട്.
