കൊല്ലം ജില്ലയിലെ പത്തനാപുരം ബ്ലോക്ക് ഡിവിഷന് തിരഞ്ഞെടുപ്പില് വോട്ടിങ് മെഷീനുകള് മാറിപ്പോയത് ആശയക്കുഴപ്പമുണ്ടാക്കി. പട്ടാഴി പാണ്ടിത്തിട ഗവ. എല്.പി.എസ് ബൂത്തില് നടുത്തേരി ബ്ലോക്ക് ഡിവിഷനിലേക്ക് ഉപയോഗിക്കേണ്ട ഇലക്ട്രോണിക് വോട്ടിങ് മെഷീന് (EVM) പകരം തലവൂര് ഡിവിഷന്റേതാണ് എത്തിച്ചത്. കൂടാതെ, വോട്ടെടുപ്പ് ആരംഭിച്ചതിന് പിന്നാലെ പലയിടത്ത് നിന്നായി ഇവിഎം തകരാറുകളും റിപ്പോര്ട്ട് ചെയ്തു.
തദ്ദേശ സ്വയംഭരണ തിരഞ്ഞെടുപ്പ് പുരോഗമിക്കവേ, കൊല്ലം കോര്പ്പറേഷനിലെ ഭരണിക്കാവ് ഡിവിഷന് ഒന്നാം നമ്പര് ബൂത്ത് ഉള്പ്പെടെ പലയിടത്തും വോട്ടിങ് മെഷീനുകള് (EVM) തകരാറിലായി. ഇടുക്കി ജില്ലയിലും സമാന പ്രശ്നങ്ങള് റിപ്പോര്ട്ട് ചെയ്തു. വണ്ടിപ്പെരിയാര് പഞ്ചായത്തിലെ 13-ാം വാര്ഡ് ബൂത്ത് ഒന്ന്, വണ്ടിപ്പെരിയാര് തങ്കമല, നെടുംകണ്ടം പഞ്ചായത്തിലെ 14-ാം വാര്ഡ് തൂക്കുപാലം എസ്.എന്.ഡി.പി ഹാള് എന്നിവിടങ്ങളിലും യന്ത്രത്തകരാര് കാരണം വോട്ടെടുപ്പ് തടസ്സപ്പെട്ടു. ഈ ബൂത്തുകളിലെല്ലാം തകരാറുകള് പരിഹരിച്ച് വോട്ടെടുപ്പ് പുനരാരംഭിക്കാനുള്ള ശ്രമങ്ങള് അധികൃതര് ഊര്ജ്ജിതമാക്കിയിട്ടുണ്ട്
