ന്യൂഡൽഹി: പശ്ചിമ ബംഗാളിലെ വോട്ടർ പട്ടിക പരിഷ്കരണവുമായി ബന്ധപ്പെട്ട കേസിൽ സുപ്രീംകോടതിയിൽ നേരിട്ടെത്തി മുഖ്യമന്ത്രി മമത ബാനർജി. പശ്ചിമ ബംഗാൾ സർക്കാർ സമർപ്പിച്ച എസ്.ഐ.ആർ (Special In-depth Revision) ഹർജി പരിഗണിക്കുന്നതിനിടെയാണ് അഭിഭാഷകർക്കൊപ്പം മമത ബാനർജി കോടതി മുറിയിലെത്തിയത്. ചീഫ് ജസ്റ്റിസ് സൂര്യകാന്ത്, ജസ്റ്റിസ് ജോയ്മല്യ ബാഗ്ചി, ജസ്റ്റിസ് വിപുല് എം. പഞ്ചോളി എന്നിവരടങ്ങിയ ബെഞ്ചാണ് ഹർജി പരിഗണിച്ചത്.
വാദത്തിനിടെ തന്റെ ഭാഗം നേരിട്ട് വിശദീകരിക്കാൻ മമത ബാനർജി ശ്രമിച്ചെങ്കിലും, കീഴ്വഴക്കമനുസരിച്ച് അഭിഭാഷകൻ മുഖേന വാദിക്കാൻ ചീഫ് ജസ്റ്റിസ് ആവശ്യപ്പെട്ടു. വോട്ടർ പട്ടികയിൽ നിന്ന് പേരുകൾ നീക്കം ചെയ്യാൻ മാത്രമാണ് എസ്.ഐ.ആർ പ്രക്രിയ ഉപയോഗിക്കുന്നതെന്ന് മമത കോടതിയിൽ ആരോപിച്ചു. വിവാഹശേഷം ഒരു മകൾ ഭർത്താവിന്റെ വീട്ടിലേക്ക് താമസം മാറുമ്പോൾ ഭർത്താവിന്റെ കുടുംബപ്പേര് ഉപയോഗിക്കുന്നതിനെ സംബന്ധിച്ചും അവർ ചോദ്യങ്ങൾ ഉയർത്തി.
തിരഞ്ഞെടുപ്പ് നടക്കാനിരിക്കുന്ന ബംഗാളിനെ മാത്രമാണ് ലക്ഷ്യമിടുന്നതെന്നും അയൽ സംസ്ഥാനമായ അസമിൽ എന്തുകൊണ്ട് ഇതേ പ്രക്രിയ നടപ്പിലാക്കുന്നില്ലെന്നും മമത ബാനർജി സുപ്രീംകോടതിയിൽ ചോദിച്ചു. രാഷ്ട്രീയ പ്രാധാന്യമുള്ള ഈ കേസിൽ മുഖ്യമന്ത്രി തന്നെ നേരിട്ട് ഹാജരായത് സുപ്രീംകോടതിയിൽ നാടകീയമായ സാഹചര്യമാണ് സൃഷ്ടിച്ചത്. വോട്ടർ പട്ടികയിലെ ക്രമക്കേടുകൾ സംബന്ധിച്ച ഈ കേസിൽ കോടതിയുടെ തുടർന്നുള്ള നിരീക്ഷണങ്ങൾ ബംഗാൾ രാഷ്ട്രീയത്തിൽ നിർണ്ണായകമാകും
