തിരുവനന്തപുരം: തിരുവനന്തപുരത്തെ ചരിത്രപ്രസിദ്ധമായ കവടിയാർ കൊട്ടാരത്തിൽ നിന്ന് ഏകദേശം രണ്ട് കോടി രൂപയോളം വിലമതിക്കുന്ന സ്വർണാഭരണങ്ങൾ മോഷണം പോയതായി പരാതി. തിരുവിതാംകൂർ രാജകുടുംബാംഗം അശ്വതി തിരുനാൾ ഗൗരി ലക്ഷ്മി ഭായിയാണ് പേരൂർക്കട പോലീസിൽ പരാതി നൽകിയത്.
ഏകദേശം 40 പവനിലധികം തൂക്കം വരുന്ന 12-ഓളം സ്വർണാഭരണങ്ങൾ നഷ്ടപ്പെട്ടിട്ടുണ്ടെന്നാണ് റിപ്പോർട്ടുകൾ. ഇതിൽ പാരമ്പര്യമായി കൈമാറി വന്നതും അത്യപൂർവ്വവുമായ ആഭരണങ്ങളും ഉൾപ്പെടുന്നു. പത്മനാഭസ്വാമിയുടെ ചിത്രം കൊത്തിയ പതക്കം, രത്നങ്ങൾ പതിപ്പിച്ച ആഭരണങ്ങൾ, നാഗപടം, സ്വർണ്ണനാണയങ്ങൾ തുടങ്ങിയവ നഷ്ടപ്പെട്ടവയിൽപ്പെടുന്നു. ഇവയുടെ പുരാതന മൂല്യം കണക്കിലെടുക്കുമ്പോൾ വിപണി വില ഇതിലും അധികമായിരിക്കുമെന്നാണ് കരുതുന്നത്.
പരാതിയുടെ അടിസ്ഥാനത്തിൽ പേരൂർക്കട പോലീസ് ഭാരതീയ ന്യായ സംഹിത (BNS) സെക്ഷൻ 305 പ്രകാരം കേസെടുത്ത് അന്വേഷണം ആരംഭിച്ചു. അസിസ്റ്റന്റ് കമ്മീഷണറുടെ നേതൃത്വത്തിലുള്ള പ്രത്യേക സംഘമാണ് അന്വേഷണം നടത്തുന്നത്. കൊട്ടാരത്തിൽ പ്രവേശനാനുമതിയുള്ളവരിലേക്കും കൊട്ടാരവുമായി ബന്ധമുള്ളവരിലേക്കുമാണ് അന്വേഷണം നീളുന്നത്. കൊട്ടാരത്തിലെ സിസിടിവി ദൃശ്യങ്ങൾ പരിശോധിക്കുകയും ജീവനക്കാരുടെ മൊഴിയെടുക്കുകയും ചെയ്യുന്നതടക്കമുള്ള നടപടികൾ പോലീസ് സ്വീകരിച്ചുവരികയാണ്.
