പാലക്കാട്: അട്ടപ്പാടിയില് നവജാത ശിശുമരിച്ചു. ഷോളയൂര് സ്വര്ണപിരിവില് സുമിത്രയുടെ മകനാണ് മരിച്ചത്. ആറ് മാസം ഗര്ഭിണിയായിരുന്ന സുമിത്ര വീട്ടില് വച്ച് പ്രസവിക്കുകയായിരുന്നു.
പിന്നാലെ അട്ടപ്പാടിയിലെ സ്വകാര്യ ആശുപത്രിയിലേക്ക് എത്തിച്ചപ്പോഴേക്കും കുഞ്ഞ് മരിച്ചു. സംഭവത്തില് ജില്ലാ കളക്ടര് റിപ്പോര്ട്ട് തേടി.
ജില്ലാ മെഡിക്കല് ഓഫീസര്, ഐസിഡിഎസ് എന്നിവരോടാണ് കളക്ടര് റിപ്പോര്ട്ട് തേടിയിരിക്കുന്നത്. ആശുപത്രിക്ക് വീഴ്ചയുണ്ടോയെന്ന് പരിശോധിക്കാനും നിര്ദേശം നല്കിയിട്ടുണ്ട്.
സുമിത്രയുടെ ആറാമത്തെ പ്രസവമായിരുന്നു ഇത്. ഇതുവരെ നടന്ന പ്രസവങ്ങളിലെല്ലാം കുഞ്ഞുങ്ങള് മരിച്ചിരുന്നു. ഇത്തവണ മാര്ച്ചിലായിരുന്നു പ്രസവം നടക്കേണ്ടിയിരുന്നത്. എന്നാല് ആറുമാസമായപ്പോള് പ്രസവം നടന്നു, കുഞ്ഞ് മരിച്ചു. യുവതിയെ കോട്ടത്തറ താലൂക്ക് ആശുപത്രിയില് പ്രവേശിപ്പിച്ചിട്ടുണ്ട്. യുവതിയുടെ ആരോഗ്യനില തൃപ്തികരമെന്ന് ആശുപത്രി അധികൃതര് അറിയിച്ചു
