സിഡ്നി: പടിഞ്ഞാറൻ സിഡ്നിയിലെ മെരിലാൻഡ്സിൽ തിരക്കേറിയ ഷോപ്പിംഗ് മേഖലയിൽ ഉണ്ടായ കത്തിയാക്രമണത്തിൽ ഒരാൾ കൊല്ലപ്പെടുകയും രണ്ടുപേർക്ക് ഗുരുതരമായി പരിക്കേൽക്കുകയും ചെയ്തു. ബുധനാഴ്ച രാവിലെ പത്ത് മണിയോടെ മെരിലാൻഡ്സ് റോഡിലായിരുന്നു നാടിനെ നടുക്കിയ സംഭവം. ഏകദേശം 20-30 സെന്റീമീറ്റർ നീളമുള്ള കത്തിയുമായാണ് അക്രമി എത്തിയത്.
രണ്ടുപേരെ കടയ്ക്കുള്ളിൽ വെച്ചും ഒരാളെ തെരുവിലും വെച്ചാണ് ഇയാൾ ആക്രമിച്ചത്. പരിക്കേറ്റവരിൽ 30-40 വയസ്സ് പ്രായം തോന്നിക്കുന്ന ഒരാൾ സംഭവസ്ഥലത്ത് തന്നെ മരിച്ചു. കഴുത്തിന് പരിക്കേറ്റ 22-കാരനെയും നെഞ്ചിനും വയറിനും പരിക്കേറ്റ 47-കാരിയെയും വെസ്റ്റ്മീഡ് ആശുപത്രിയിൽ പ്രവേശിപ്പിച്ചു. സ്ത്രീയുടെ നില അതീവ ഗുരുതരമായി തുടരുകയാണ്.
സംഭവത്തിന് ശേഷം ഓടി രക്ഷപ്പെട്ട പ്രതിയെ 40 മിനിറ്റിനുള്ളിൽ സ്മിത്ത് സ്ട്രീറ്റിലെ ഒരു വീടിന് പിന്നിൽ നിന്ന് പോലീസ് പിടികൂടി. ആക്രമണത്തിന് പിന്നിലെ കാരണം വ്യക്തമല്ലെങ്കിലും, കൊല്ലപ്പെട്ടവരോ പരിക്കേറ്റവരോ പ്രതിയുമായി മുൻപരിചയമില്ലാത്തവരാണെന്ന് പോലീസ് സൂപ്രണ്ട് സൈമൺ ഗ്ലാസ്സർ സ്ഥിരീകരിച്ചു. പ്രതിക്ക് നേരത്തെയും മാനസികാരോഗ്യവുമായി ബന്ധപ്പെട്ട ചെറിയ കുറ്റകൃത്യങ്ങളിൽ പങ്കുണ്ടായിരുന്നതായി പോലീസ് അറിയിച്ചു. പരിക്കേറ്റവരെ സഹായിക്കാൻ ഉടൻ മുന്നോട്ടുവന്ന നാട്ടുകാരെ പോലീസ് അഭിനന്ദിച്ചു. സംഭവസ്ഥലത്ത് നിന്ന് ആയുധം കണ്ടെടുത്തിട്ടുണ്ട്.
