റാന്നി: പത്തനംതിട്ട റാന്നിക്ക് സമീപം തുലാപ്പള്ളിയില് ശബരിമല തീര്ഥാടകര് സഞ്ചരിച്ചിരുന്ന ബസ് നിയന്ത്രണം വിട്ടുണ്ടായ അപകടത്തില് മൂന്ന് പേര്ക്ക് ഗുരുതര പരുക്ക്. തുലാപ്പള്ളി ആലപ്പാട്ട് ജംക്ഷനില് ഇന്ന് രാവിലെ 7.45ഓടെയായിരുന്നു അപകടം. തമിഴ്നാട്ടില് നിന്നുള്ള തീര്ഥാകര് സഞ്ചരിച്ചിരുന്ന ബസാണ് തുലാപ്പള്ളി ഇറക്കത്ത് നിയന്ത്രണം വിട്ടത്. തുടര്ന്ന് ബസ് രണ്ട് കാറുകളിലും ഒരു ടൂറിസ്റ്റ് ബസിലും ഇടിക്കുകയായിരുന്നു. അപകടത്തില്പ്പെട്ട വാഹനങ്ങളിലെല്ലാം ശബരിമല തീര്ഥാടകരാണ് സഞ്ചരിച്ചിരുന്നത്.
ഇതില് കാറിലുണ്ടായിരുന്ന മൂന്ന് പേരുടെ നില ഗുരുതരമാണ്. ഇവരെ എരുമേലിയിലെ ആശുപത്രിയിലേക്ക് മാറ്റി. നിസാര പരുക്കേറ്റവരെ നിലയ്ക്കലിലെ ആശുപത്രിയിലേക്കും മാറ്റിയിട്ടുണ്ട്. അതേസമയം നിരോധനം മറികടന്നാണ് തുലാപ്പള്ളി ശബരിമല പഴയ റോഡിലൂടെ തീര്ഥാടക വാഹനങ്ങള് വിടുന്നതെന്ന് പ്രദേശവാസികള് ആരോപിച്ചു. പുതിയ റോഡിലൂടെയാണ് തീര്ഥാടക വാഹനങ്ങള് കടത്തിവിടേണ്ടതെന്ന് കോടതി ഉത്തരവ് ഉണ്ടായിരുന്നുവെന്നും നാട്ടുകാര് പറയുന്നു
