സംസ്ഥാനത്തെ സ്വർണവിലയിൽ വൻ കുതിച്ചുചാട്ടം രേഖപ്പെടുത്തി. ചരിത്രത്തിലെ എല്ലാ റെക്കോർഡുകളും തകർത്ത് ഒരു പവൻ സ്വർണത്തിന് 1,800 രൂപയാണ് വർദ്ധിച്ചത്. ഇതോടെ പവൻ വില 1,19,320 രൂപ എന്ന റെക്കോർഡ് നിലവാരത്തിലെത്തി. ഗ്രാമിന് 225 രൂപ വർദ്ധിച്ച് 14,915 രൂപയായി. ആഗോള വിപണിയിൽ സ്വർണവില ഔൺസിന് 5,000 ഡോളർ എന്ന മാന്ത്രിക സംഖ്യ കടന്നതാണ് ആഭ്യന്തര വിപണിയിലും പ്രതിഫലിച്ചത്.
കഴിഞ്ഞ ഡിസംബർ 23-നാണ് സ്വർണവില കേരളത്തിൽ ആദ്യമായി ഒരു ലക്ഷം രൂപ കടന്നത്. തുടർന്നുള്ള ദിവസങ്ങളിൽ വിലയിൽ നേരിയ കുറവുണ്ടായെങ്കിലും വീണ്ടും കുതിക്കുകയായിരുന്നു. അന്താരാഷ്ട്ര തലത്തിലുണ്ടായ ചില രാഷ്ട്രീയ-സാമ്പത്തിക മാറ്റങ്ങളാണ് വിപണിയെ ഇത്രമേൽ സ്വാധീനിച്ചത്. ഗ്രീൻലാൻഡിന്റെ നിയന്ത്രണവുമായി ബന്ധപ്പെട്ട് തങ്ങളോട് വിയോജിക്കുന്ന യൂറോപ്യൻ രാജ്യങ്ങളിൽ നിന്നുള്ള ഉൽപ്പന്നങ്ങൾക്ക് മേൽ കൂടുതൽ തീരുവ ചുമത്തുമെന്ന അമേരിക്കൻ പ്രസിഡന്റ് ഡോണൾഡ് ട്രംപിന്റെ പ്രഖ്യാപനം ആഗോള വിപണിയിൽ വലിയ അസ്ഥിരതയ്ക്ക് കാരണമായി.
സുരക്ഷിത നിക്ഷേപം എന്ന നിലയിൽ ലോകമെമ്പാടുമുള്ള നിക്ഷേപകർ സ്വർണത്തിലേക്ക് തിരിഞ്ഞതോടെ വില കുതിച്ചുയർന്നു. ലോകത്തെ ഏറ്റവും വലിയ സ്വർണ ഉപഭോക്താക്കളായ ഇന്ത്യയെ സംബന്ധിച്ചിടത്തോളം ഈ വിലക്കയറ്റം വിപണിയിൽ വലിയ ചലനങ്ങളുണ്ടാക്കും.
