ബുഡാപെസ്റ്റ്: ഹംഗറിയിൽ നടന്ന നിർണ്ണായകമായ പാർലമെന്ററി തിരഞ്ഞെടുപ്പിൽ പ്രധാനമന്ത്രി വിക്ടർ ഓർബനും അദ്ദേഹത്തിന്റെ ഫിഡെസ് (Fidesz) പാർട്ടിയും കനത്ത പരാജയം ഏറ്റുവാങ്ങി. ഇതോടെ 16 വർഷം നീണ്ടുനിന്ന ഓർബന്റെ ഭരണത്തിന് അന്ത്യമായി. പ്രതിപക്ഷ നിരയിലെ പുതിയ തരംഗമായ പീറ്റർ മഗ്യാറിന്റെ നേതൃത്വത്തിലുള്ള തിസ്സ പാർട്ടി വൻ ഭൂരിപക്ഷത്തോടെ അധികാരത്തിലേക്ക് കുതിക്കുകയാണ്.
2010 മുതൽ തുടർച്ചയായി നാല് തവണ അധികാരത്തിലിരുന്ന വിക്ടർ ഓർബൻ തിരഞ്ഞെടുപ്പ് രാത്രിയിൽ തന്നെ തോൽവി സമ്മതിച്ചു. പീറ്റർ മഗ്യാറിനെ ഫോണിൽ വിളിച്ച് അദ്ദേഹം അഭിനന്ദനങ്ങൾ അറിയിച്ചു. “വേദനനിറഞ്ഞ ഫലമാണിത്, എങ്കിലും പ്രതിപക്ഷത്തിരുന്ന് ഞങ്ങൾ രാജ്യത്തെ സേവിക്കും” എന്ന് ഓർബൻ അനുയായികളോട് പറഞ്ഞു.ഒരിക്കൽ ഓർബന്റെ വിശ്വസ്തനും അദ്ദേഹത്തിന്റെ പാർട്ടിയിലെ അംഗവുമായിരുന്ന പീറ്റർ മഗ്യാർ, അഴിമതിക്കും സ്വേച്ഛാധിപത്യ ഭരണത്തിനുമെതിരെ പോരാടിയാണ് ജനപ്രീതി നേടിയത്. അദ്ദേഹത്തിന്റെ പാർട്ടിക്ക് ഏകദേശം 53 ശതമാനത്തോളം വോട്ട് ലഭിച്ചതായാണ് പ്രാഥമിക കണക്കുകൾ.
യൂറോപ്യൻ യൂണിയനുമായി (EU) നിരന്തരം കൊമ്പുകോർത്തിരുന്ന ഓർബന്റെ പതനം യൂറോപ്യൻ രാഷ്ട്രീയത്തിൽ വലിയ മാറ്റങ്ങൾക്ക് വഴിയൊരുക്കും. “ഹംഗറി യൂറോപ്പിനെ തിരഞ്ഞെടുത്തു” എന്നാണ് വിജയത്തിന് ശേഷം പീറ്റർ മഗ്യാർ പ്രതികരിച്ചത്.79 ശതമാനത്തിലധികം വോട്ടർമാർ സമ്മതിദാനാവകാശം വിനിയോഗിച്ച ഈ തിരഞ്ഞെടുപ്പ് ഹംഗറിയുടെ ചരിത്രത്തിലെ തന്നെ ഏറ്റവും ഉയർന്ന പോളിംഗ് രേഖപ്പെടുത്തിയ ഒന്നായി മാറി.
ഓർബന്റെ പരാജയത്തെ യൂറോപ്യൻ യൂണിയൻ നേതാക്കൾ സ്വാഗതം ചെയ്തു. അഴിമതി വിരുദ്ധ പോരാട്ടത്തിനും ജനാധിപത്യ മൂല്യങ്ങൾക്കും ലഭിച്ച വിജയമായി ഇതിനെ പലരും വിലയിരുത്തുന്നു.റഷ്യയുമായും ഡൊണാൾഡ് ട്രംപുമായും അടുത്ത ബന്ധം പുലർത്തിയിരുന്ന ഓർബന്റെ പരാജയം ആഗോള രാഷ്ട്രീയത്തിലും ചർച്ചാവിഷയമായിട്ടുണ്ട്. പീറ്റർ മഗ്യാറിന്റെ നേതൃത്വത്തിൽ പുതിയ സർക്കാർ അധികാരമേൽക്കുന്നതോടെ ഹംഗറി യൂറോപ്യൻ യൂണിയനുമായും നാറ്റോയുമായും കൂടുതൽ അടുത്ത ബന്ധം പുലർത്തുമെന്നാണ് പ്രതീക്ഷിക്കുന്നത്.
