സിഡ്നി: ഇറാൻ സംഘർഷം പ്രതീക്ഷിച്ചതിലും നീണ്ടുനിന്നാൽ രാജ്യത്ത് ഇന്ധന റേഷൻ ഏർപ്പെടുത്തേണ്ടി വന്നേക്കാമെന്ന് ഓസ്ട്രേലിയൻ സർക്കാർ സൂചന നൽകി. എന്നാൽ നിലവിൽ ഇന്ധന വിതരണം തടസ്സമില്ലാതെ തുടരുന്നുണ്ടെന്നും പൊതുജനങ്ങൾ പരിഭ്രാന്തരായി ഇന്ധനം ശേഖരിക്കേണ്ട (Panic-buying) സാഹചര്യമില്ലെന്നും ഉപപ്രധാനമന്ത്രി റിച്ചാർഡ് മാൾസ് വ്യക്തമാക്കി.
ഇന്ധനവില കുതിച്ചുയരുന്ന സാഹചര്യത്തിൽ പ്രമുഖ ഇന്ധന വിതരണക്കാരെ കോംപെറ്റീഷൻ വാച്ച്ഡോഗ് (ACCC) വിളിച്ചുവരുത്തിയ ദിവസം തന്നെയാണ് സർക്കാർ നിലപാട് വ്യക്തമാക്കിയത്. ഇന്ധന നിയന്ത്രണം വേണ്ടിവരുമോ എന്ന ചോദ്യത്തിന്, യുദ്ധം എത്രനാൾ നീണ്ടുനിൽക്കും എന്നതിനെ ആശ്രയിച്ചിരിക്കും അതെന്നായിരുന്നു മാൾസിന്റെ മറുപടി. നിലവിൽ അത്തരമൊരു പദ്ധതിയില്ലെന്നും എന്നാൽ സ്ഥിതിഗതികൾ നിരീക്ഷിച്ചു വരികയാണെന്നും അദ്ദേഹം കൂട്ടിച്ചേർത്തു.
ഹോർമുസ് കടലിടുക്ക് അടഞ്ഞത് മൂലമുണ്ടായ വിതരണ തടസ്സം മറികടക്കാൻ സർക്കാർ അടിയന്തര നടപടികൾ സ്വീകരിച്ചിട്ടുണ്ട്. ഇതിന്റെ ഭാഗമായി ആഭ്യന്തര ഇന്ധന ശേഖരത്തിന്റെ 20 ശതമാനം വിപണിയിൽ എത്തിച്ചു. കൂടാതെ, ഇന്ധന ഗുണനിലവാര മാനദണ്ഡങ്ങളിൽ ഇളവ് വരുത്തി ഉയർന്ന സൾഫർ അടങ്ങിയ ഉൽപ്പന്നങ്ങൾ പ്രാദേശികമായി ഉപയോഗിക്കാൻ അനുമതി നൽകുകയും ചെയ്തു. ഇന്ധനക്ഷാമം രൂക്ഷമായ പ്രാദേശിക മേഖലകളെയാണ് സർക്കാർ പ്രധാനമായും ലക്ഷ്യമിടുന്നത്.
ലോകത്തിലെ എണ്ണയുടെ 20 ശതമാനവും പ്രകൃതിവാതകം, വളം തുടങ്ങിയവയും കടന്നുപോകുന്ന ഹോർമുസ് കടലിടുക്കിലെ പ്രതിസന്ധി 1970-കളിലെ എണ്ണ പ്രതിസന്ധിയേക്കാൾ ഗുരുതരമാണെന്ന് ഇന്റർനാഷണൽ എനർജി ഏജൻസി വിലയിരുത്തുന്നു. എങ്കിലും ഓസ്ട്രേലിയയിലേക്കുള്ള എണ്ണക്കപ്പലുകൾ ഇപ്പോൾ തടസ്സമില്ലാതെ എത്തുന്നുണ്ടെന്നും, ചിലയിടങ്ങളിലെ ക്ഷാമത്തിന് കാരണം ആളുകൾ പരിഭ്രാന്തരായി അമിതമായി ഇന്ധനം വാങ്ങുന്നതാണെന്നും ട്രഷറർ ജിം ചാൽമേഴ്സ് പറഞ്ഞു.
