പാലക്കാട്: വിവിധ വിവാദങ്ങൾക്കും നിയമനടപടികൾക്കും ഇടയിൽ ഒരിടവേളയ്ക്ക് ശേഷം പാലക്കാട് എം.എൽ.എ രാഹുൽ മാങ്കൂട്ടത്തിൽ ഇന്ന് മണ്ഡലത്തിലെത്തും. മൂന്നാം ബലാത്സംഗക്കേസിൽ അറസ്റ്റിലായതിനെത്തുടർന്ന് പൊതുരംഗത്തുനിന്നും മാറിനിന്നിരുന്ന അദ്ദേഹം, ജാമ്യം ലഭിച്ചതിന് ശേഷം ആദ്യമായാണ് മണ്ഡലത്തിൽ സന്ദർശനം നടത്തുന്നത്. തന്റെ നേതൃത്വത്തിൽ നിർമ്മിച്ച വീടുകളുടെ താക്കോൽദാനം നിർവ്വഹിക്കുന്നതിനായാണ് അദ്ദേഹം പാലക്കാട്ടെത്തുന്നത്.
ഇന്ന് രാവിലെ പാലക്കാട് എം.എൽ.എ ഓഫീസിലെത്തിയ അദ്ദേഹത്തിന് കോൺഗ്രസ് നേതാക്കളും പ്രവർത്തകരും ചേർന്ന് സ്വീകരണം നൽകി. താക്കോൽദാനത്തിന് ശേഷം വരാനിരിക്കുന്ന തിരഞ്ഞെടുപ്പ് പ്രവർത്തനങ്ങളിൽ അദ്ദേഹം സജീവമാകുമെന്നാണ് റിപ്പോർട്ടുകൾ. അതേസമയം, രാഹുൽ മാങ്കൂട്ടത്തിന് ഹൈക്കോടതി അനുവദിച്ച മുൻകൂർ ജാമ്യം റദ്ദാക്കണമെന്ന് ആവശ്യപ്പെട്ട് പരാതിക്കാരി സുപ്രീം കോടതിയെ സമീപിച്ചിട്ടുണ്ട്. ഈ ഹർജി കോടതിയുടെ പരിഗണനയിലാണ്.
