ടെഹ്റാൻ: അന്താരാഷ്ട്ര ഉപരോധങ്ങൾക്കിടയിൽ വലയുന്ന ഇറാന് സഹായഹസ്തവുമായി റഷ്യ. അത്യാധുനിക മരുന്നുകളും മെഡിക്കൽ ഉപകരണങ്ങളും അടങ്ങുന്ന വലിയൊരു ശേഖരം റഷ്യ ഇറാനിലെത്തിച്ചു. ഇരുരാജ്യങ്ങളും തമ്മിലുള്ള തന്ത്രപരമായ സഹകരണം ശക്തമാക്കുന്നതിന്റെ ഭാഗമായാണ് ഈ നീക്കം.
റഷ്യൻ വിമാനത്തിൽ ടെഹ്റാനിലെ ഇമാം ഖൊമേനി അന്താരാഷ്ട്ര വിമാനത്താവളത്തിലാണ് മെഡിക്കൽ സാമഗ്രികൾ എത്തിച്ചത്. കാൻസർ ചികിത്സയ്ക്കുള്ള മരുന്നുകൾ, ശസ്ത്രക്രിയ ഉപകരണങ്ങൾ, മറ്റ് അവശ്യ മെഡിക്കൽ കിറ്റുകൾ എന്നിവ ഇതിൽ ഉൾപ്പെടുന്നു.
പാശ്ചാത്യ രാജ്യങ്ങൾ ഏർപ്പെടുത്തിയ കടുത്ത സാമ്പത്തിക ഉപരോധം മൂലം ഇറാനിലെ ആരോഗ്യമേഖല വലിയ പ്രതിസന്ധി നേരിടുന്ന സാഹചര്യത്തിലാണ് റഷ്യയുടെ ഈ ഇടപെടൽ. റഷ്യൻ വിദേശകാര്യ മന്ത്രാലയവും ആരോഗ്യ മന്ത്രാലയവും സംയുക്തമായാണ് ഈ സഹായ പദ്ധതി ഏകോപിപ്പിച്ചത്.
