തിരുവനന്തപുരം: ശമ്പള പരിഷ്കരണ കുടിശ്ശികയും ആനുകൂല്യങ്ങളും ആവശ്യപ്പെട്ട് സംസ്ഥാനത്ത് സർക്കാർ ജീവനക്കാരും ഡോക്ടർമാരും സമരരംഗത്ത്. മെഡിക്കൽ കോളേജ് ഡോക്ടർമാരുടെ സംഘടനയായ കെ.ജി.എം.സി.ടി.എ ഫെബ്രുവരി 16 മുതൽ അനിശ്ചിതകാല ഒ.പി. ബഹിഷ്കരണത്തിലേക്ക് നീങ്ങുമെന്ന് ഇന്ന് ഔദ്യോഗികമായി പ്രഖ്യാപിച്ചു. സർക്കാർ നൽകിയ ഉറപ്പുകൾ പാലിക്കാത്തതിൽ പ്രതിഷേധിച്ചാണ് സമരം കടുപ്പിക്കുന്നത്. തിരുവനന്തപുരം മെഡിക്കൽ കോളേജിൽ നിലവിൽ നടന്നുവരുന്ന റിലേ നിരാഹാര സമരവും മെഡിക്കൽ ബോർഡ് ബഹിഷ്കരണവും തുടരുമെന്നും ഭാരവാഹികൾ അറിയിച്ചു. ഇതിന്റെ ഭാഗമായി നാളെ വൈകുന്നേരം എല്ലാ മെഡിക്കൽ കോളേജുകളിലും മെഴുകുതിരി തെളിച്ചുള്ള പ്രതിഷേധം സംഘടിപ്പിക്കും. ഫെബ്രുവരി 19 മുതൽ അടിയന്തരമല്ലാത്ത ശസ്ത്രക്രിയകളും ബഹിഷ്കരിക്കാനാണ് ഡോക്ടർമാരുടെ തീരുമാനം.
അതേസമയം, കേന്ദ്ര-സംസ്ഥാന ബജറ്റുകൾക്ക് പിന്നാലെ സർക്കാർ ജീവനക്കാരും സമരപാതയിലാണ്. ക്ഷാമബത്ത വർദ്ധിപ്പിച്ചുകൊണ്ടുള്ള ഉത്തരവിൽ കുടിശ്ശികയെക്കുറിച്ച് വ്യക്തതയില്ലാത്തതിൽ പ്രതിഷേധിച്ച് സെക്രട്ടേറിയറ്റ് ആക്ഷൻ കൗൺസിലിന്റെ നേതൃത്വത്തിൽ ഇന്ന് സെക്രട്ടേറിയറ്റിലേക്ക് പ്രതിഷേധ മാർച്ച് സംഘടിപ്പിച്ചു. ബജറ്റിലെ വാഗ്ദാനങ്ങൾ സർക്കാർ ലംഘിച്ചുവെന്നാണ് ജീവനക്കാരുടെ ആരോപണം.
വിദ്യാഭ്യാസ മേഖലയിലും സമരത്തിനുള്ള ഒരുക്കങ്ങൾ പൂർത്തിയായി വരികയാണ്. ഫെബ്രുവരി 12-ന് വിവിധ ട്രേഡ് യൂണിയനുകൾ പ്രഖ്യാപിച്ച ദേശീയ പണിമുടക്കിന് പിന്തുണയുമായി എസ്.എഫ്.ഐ രംഗത്തെത്തി. അന്ന് സംസ്ഥാനത്തെ വിദ്യാഭ്യാസ സ്ഥാപനങ്ങളിൽ പഠിപ്പുമുടക്ക് സമരം നടത്തുമെന്ന് സംഘടന അറിയിച്ചു. ഇതോടെ വ്യാഴാഴ്ച സംസ്ഥാനത്തെ വിദ്യാഭ്യാസ രംഗം പൂർണ്ണമായും സ്തംഭിക്കാനിടയുണ്ട്. കൂടാതെ, ബി.എസ്.എൻ.എൽ ജീവനക്കാരും പന്ത്രണ്ടാം തീയതിയിലെ പണിമുടക്കിന്റെ പ്രചാരണാർത്ഥം ഇന്ന് സംസ്ഥാനവ്യാപകമായി ഗേറ്റ് മീറ്റിംഗുകളും കൺവെൻഷനുകളും സംഘടിപ്പിച്ചു.
