മാഡ്രിഡ്/ലിസ്ബൺ: ലിയോനാർഡോ കൊടുങ്കാറ്റ് വീശിയടിച്ചതോടെ സ്പെയിനിലും പോർച്ചുഗലിലും ജനജീവിതം ദുസ്സഹമായി. കഴിഞ്ഞ ഏതാനും ദിവസങ്ങളായി തുടരുന്ന അതിശക്തമായ മഴയിലും കാറ്റിലും പെട്ട് ഒരാൾ കൊല്ലപ്പെടുകയും സ്പെയിനിൽ ഒരു സ്ത്രീയെ കാണാതാവുകയും ചെയ്തു. ദക്ഷിണ സ്പെയിനിലെ അന്തലൂഷ്യ (Andalusia) പ്രവിശ്യയിൽ നിന്ന് മാത്രം ഏഴായിരത്തിലധികം ആളുകളെയാണ് സുരക്ഷിത സ്ഥാനങ്ങളിലേക്ക് മാറ്റിയത്.
പോർച്ചുഗലിൽ വെള്ളപ്പൊക്കത്തിൽ കാർ ഒലിച്ചുപോയാണ് എഴുപതുകാരനായ ഒരാൾ മരണപ്പെട്ടത്. സ്പെയിനിലെ മലാഗയിൽ തന്റെ വളർത്തുനായയെ രക്ഷിക്കാൻ ശ്രമിക്കുന്നതിനിടെ നദിയിൽ വീണ നാൽപ്പത്തിയഞ്ചുകാരിയെ കണ്ടെത്താനായി വ്യോമസേനയുടെയും ഡോഗ് സ്ക്വാഡിന്റെയും സഹായത്തോടെ തിരച്ചിൽ തുടരുകയാണ്. ഗ്രാസലേമ (Grazalema) പോലുള്ള മലയോര ഗ്രാമങ്ങളിൽ നിന്ന് ജനങ്ങളെ പൂർണ്ണമായും ഒഴിപ്പിച്ചു. മലനിരകളിലെ ഭൂഗർഭ ജലനിരപ്പ് ഉയരുന്നത് ഉരുൾപൊട്ടലിനും വൻതോതിലുള്ള മണ്ണിടിച്ചിലിനും കാരണമായേക്കാമെന്ന ഭീതിയിലാണ് അധികൃതർ ഈ നടപടിയെടുത്തത്.
പോർച്ചുഗലിലെ പ്രശസ്ത നഗരമായ പോർട്ടോയിൽ ഡൂറോ നദി കരകവിഞ്ഞൊഴുകിയതിനെത്തുടർന്ന് നദീതീരത്തെ കഫേകളും വ്യാപാര സ്ഥാപനങ്ങളും വെള്ളത്തിനടിയിലായി. തലസ്ഥാനമായ ലിസ്ബണിലെ ടാഗസ് (Tagus) നദിയിലും ജലനിരപ്പ് അപകടകരമായ രീതിയിൽ ഉയരുകയാണ്. ഏകദേശം മൂന്ന് പതിറ്റാണ്ടിനിടയിലെ ഏറ്റവും വലിയ പ്രളയ ഭീഷണിയിലാണ് ടാഗസ് നദീതടമെന്ന് പോർച്ചുഗീസ് സിവിൽ പ്രൊട്ടക്ഷൻ അതോറിറ്റി മുന്നറിയിപ്പ് നൽകി. കൊടുങ്കാറ്റ് വിതച്ച നാശനഷ്ടങ്ങൾ കണക്കിലെടുത്ത് പോർച്ചുഗലിലെ 69 മുനിസിപ്പാലിറ്റികളിൽ പ്രഖ്യാപിച്ച ‘കലാമിറ്റി സ്റ്റേറ്റ്’ (State of Calamity) ഫെബ്രുവരി പകുതി വരെ നീട്ടിയിട്ടുണ്ട്. വരും ദിവസങ്ങളിൽ കൂടുതൽ മഴയ്ക്ക് സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് കാലാവസ്ഥാ നിരീക്ഷണ കേന്ദ്രങ്ങൾ നിർദ്ദേശിച്ചു.
