ഇടുക്കി: ജില്ലയിലെ സാഹസിക വിനോദസഞ്ചാര കേന്ദ്രങ്ങളിൽ സുരക്ഷ ഉറപ്പാക്കുന്നതിന്റെ ഭാഗമായി ഈ മാസം മുതൽ വ്യാപക പരിശോധന നടത്താൻ ജില്ലാ ഭരണകൂടം തീരുമാനിച്ചു. ഫെബ്രുവരി 14 മുതൽ പരിശോധനകൾ ആരംഭിക്കാൻ ജില്ലാ കളക്ടർ ദിനേശൻ ചെറുവാട്ട് ബന്ധപ്പെട്ട ഉദ്യോഗസ്ഥർക്ക് നിർദേശം നൽകി. മാർച്ച് 31-നകം പരിശോധനകൾ പൂർത്തിയാക്കി സർക്കാരിന് റിപ്പോർട്ട് സമർപ്പിക്കാനാണ് ലക്ഷ്യമിടുന്നത്.
യാതൊരുവിധ മുൻകൂർ അനുമതിയുമില്ലാതെ പ്രവർത്തിക്കുന്ന വിനോദസഞ്ചാര കേന്ദ്രങ്ങൾ ഉടനടി അടച്ചുപൂട്ടുമെന്ന് കളക്ടർ അറിയിച്ചു. പഞ്ചായത്ത് ജോയിന്റ് ഡയറക്ടർ കൈമാറിയ വിവരങ്ങളുടെ അടിസ്ഥാനത്തിൽ, അനുമതിയില്ലാത്ത സ്ഥാപനങ്ങളിലായിരിക്കും ആദ്യഘട്ടത്തിൽ പരിശോധന നടക്കുക. വിവിധ സർക്കാർ വകുപ്പുകളിലെ ഉദ്യോഗസ്ഥരെ ഉൾപ്പെടുത്തി രൂപീകരിക്കുന്ന പ്രത്യേക സംഘമായിരിക്കും പരിശോധനകൾക്ക് നേതൃത്വം നൽകുന്നത്.
സമീപകാലത്ത് ആനച്ചാലിലെ സ്കൈ ഡൈനിങ് കേന്ദ്രത്തിൽ വിനോദസഞ്ചാരികൾ മണിക്കൂറുകളോളം ആകാശത്ത് കുടുങ്ങിയ സംഭവം വലിയ സുരക്ഷാ ആശങ്കകൾക്ക് കാരണമായിരുന്നു. ഇതിന്റെ പശ്ചാത്തലത്തിലാണ് സാഹസിക വിനോദസഞ്ചാര മേഖലയിൽ കടുത്ത നിയന്ത്രണങ്ങൾ കൊണ്ടുവരാൻ ഭരണകൂടം തീരുമാനിച്ചത്.
സാഹസിക വിനോദങ്ങൾക്കായി കൃത്യമായ സുരക്ഷാ മാനദണ്ഡങ്ങൾ (SOP) തയ്യാറാക്കുന്ന നടപടികൾ വേഗത്തിലാക്കാൻ സംസ്ഥാന സർക്കാരിനോട് ആവശ്യപ്പെടുമെന്നും കളക്ടർ വ്യക്തമാക്കി. വിനോദസഞ്ചാരികളുടെ സുരക്ഷയിൽ വിട്ടുവീഴ്ച ചെയ്യുന്ന സാഹചര്യം ഒഴിവാക്കുകയാണ് പുതിയ നടപടികളിലൂടെ ലക്ഷ്യമിടുന്നത്
