ബ്രിസ്ബേൻ: ഇ-മൊബിലിറ്റി വാഹനങ്ങൾ മൂലമുണ്ടാകുന്ന അപകടങ്ങൾ വർദ്ധിക്കുന്ന സാഹചര്യത്തിൽ, 16 വയസ്സിൽ താഴെയുള്ള കുട്ടികൾ ഇ-ബൈക്കുകളും ഇ-സ്കൂട്ടറുകളും ഓടിക്കുന്നത് നിരോധിക്കാൻ ക്വീൻസ്ലൻഡ് സർക്കാർ ഒരുങ്ങുന്നു. കഴിഞ്ഞ വർഷം ഉണ്ടായ 12 മരണങ്ങളും പരിക്കേറ്റവരുടെ എണ്ണത്തിൽ ഉണ്ടായ 112 ശതമാനം വർദ്ധനവും കണക്കിലെടുത്താണ് ഈ സുപ്രധാന തീരുമാനം.
പുതിയ നിയമപ്രകാരം ഇ-മൊബിലിറ്റി ഉപകരണങ്ങൾ ഉപയോഗിക്കാൻ കുറഞ്ഞത് 16 വയസ്സ് പ്രായമുണ്ടായിരിക്കണം. കൂടാതെ, റോഡ് നിയമങ്ങളെക്കുറിച്ച് കൃത്യമായ ധാരണയുണ്ടെന്ന് ഉറപ്പാക്കാൻ കുറഞ്ഞത് ഒരു ക്വീൻസ്ലൻഡ് ലേണർ ലൈസൻസെങ്കിലും കൈവശം വെക്കണമെന്നതും നിർബന്ധമാക്കിയിട്ടുണ്ട്. മണിക്കൂറിൽ 25 കിലോമീറ്ററിലധികം വേഗതയുള്ള കരുത്തുറ്റ ഉപകരണങ്ങളെ മോട്ടോർ സൈക്കിളുകളോ മോപ്പഡുകളോ ആയി പുനർവർഗ്ഗീകരിക്കും. ഇവ ഉപയോഗിക്കാൻ പ്രത്യേക മോട്ടോർ ബൈക്ക് ലൈസൻസ്, രജിസ്ട്രേഷൻ, ഇൻഷുറൻസ് എന്നിവ ആവശ്യമാണ്.
കാൽനടയാത്രക്കാരുടെ സുരക്ഷ മുൻനിർത്തി ഫുട്പാത്തുകളിലെ വേഗത മണിക്കൂറിൽ 10 കിലോമീറ്ററായി കുറച്ചു. നിയമങ്ങൾ ലംഘിക്കുന്നവരെ കണ്ടെത്താൻ പോലീസിന് പ്രത്യേക അധികാരങ്ങൾ നൽകിയിട്ടുണ്ട്. റാൻഡം ബ്രീത്ത് ടെസ്റ്റ് (RBT) നടത്താനും അനധികൃതമായോ രൂപമാറ്റം വരുത്തിയതോ ആയ ഉപകരണങ്ങൾ ആദ്യ തവണ തന്നെ പിടിച്ചെടുത്ത് നശിപ്പിക്കാനും പോലീസിന് അധികാരമുണ്ടാകും.
16-ഉം 17-ഉം വയസ്സുള്ളവർ നിയമം ലംഘിച്ചാൽ പിഴ ഈടാക്കും. എന്നാൽ 16 വയസ്സിൽ താഴെയുള്ള കുട്ടികൾ നിയമം ലംഘിച്ചാൽ അതിന്റെ ഉത്തരവാദിത്തം മാതാപിതാക്കൾക്കായിരിക്കും. ഇ-വീൽചെയർ ഉപയോഗിക്കുന്നവർക്ക് ഈ നിയമങ്ങളിൽ ഇളവുണ്ടാകും. ഇ-സ്കൂട്ടറുകളുടെ വേഗത കൂട്ടാനുള്ള മോഡിഫിക്കേഷൻ കിറ്റുകൾ വിൽക്കുന്നവർക്കെതിരെയും കർശന നടപടിയുണ്ടാകും. ജൂലൈ ഒന്നു മുതൽ പുതിയ നിയമം പ്രാബല്യത്തിൽ വരും.
