മെൽബൺ: ഉപയോഗിക്കുന്നവർക്ക് ഗുരുതരമായ പരിക്കുകൾക്കും തീപിടുത്തത്തിനും സാധ്യതയുണ്ടെന്ന് കണ്ടെത്തിയതിനെത്തുടർന്ന് വിപണിയിലുള്ള ഒരു പ്രത്യേക തരം ട്രാവൽ കെറ്റിൽ ഓസ്ട്രേലിയയിൽ തിരിച്ചുവിളിക്കുന്നു. വാലി സിസ്റ്റേഴ്സിന്റെ (Valley Sisters) ‘DUCK4X4 ട്രാവൽ ഫോൾഡിംഗ് ഇലക്ട്രിക് കെറ്റിൽ’ ആണ് ഡിസൈനിലെ പോരായ്മകൾ മൂലം അപകടകാരിയാണെന്ന് കണ്ടെത്തിയത്.
വെള്ളം തിളച്ചു കഴിഞ്ഞാൽ തനിയെ ഓഫ് ആകുന്ന സംവിധാനം (Automatic Switch) ഈ കെറ്റിലിൽ ഇല്ലെന്നതാണ് പ്രധാന പിഴവ്. വെള്ളം തിളച്ചതിനുശേഷവും കെറ്റിൽ പ്രവർത്തിക്കുന്നത് തുടരുന്നത് വഴി ഉപകരണം അമിതമായി ചൂടാകാനും, ഇത് ഉപയോക്താക്കൾക്ക് ഗുരുതരമായ പൊള്ളലേൽക്കാനോ അല്ലെങ്കിൽ തീപിടുത്തം മൂലം വസ്തുവകകൾ നശിക്കാനോ കാരണമാകുമെന്ന് ഉൽപ്പന്ന സുരക്ഷാ വിഭാഗം മുന്നറിയിപ്പ് നൽകി.
ചൈനയിൽ നിർമ്മിച്ച ഈ കെറ്റിൽ ‘ഓസ് ഓഫ് റോഡ്’ (Oz Off Road) എന്ന ഓൺലൈൻ സ്റ്റോർ വഴിയാണ് വിതരണം ചെയ്തിരുന്നത്. 2024 നവംബർ 1 നും 2025 മാർച്ച് 30 നും ഇടയിൽ വിപണിയിലെത്തിയ ഉൽപ്പന്നങ്ങൾക്കാണ് ഈ മുന്നറിയിപ്പ് ബാധകം. ഈ കെറ്റിൽ കൈവശമുള്ള ഉപഭോക്താക്കൾ അത് ഉപയോഗിക്കുന്നത് ഉടൻ നിർത്തണമെന്നും, പൂർണ്ണമായ റീഫണ്ടിനായി ഓൺലൈൻ സ്റ്റോറുമായി ബന്ധപ്പെട്ട് ഉൽപ്പന്നം തിരികെ നൽകണമെന്നും അധികൃതർ നിർദ്ദേശിച്ചു.
